中環在線：君陽指鄧聲興表現不如人意
鄧聲興
資料圖片
「靚佬股評人」鄧聲興（Kenny）噚日先至公告天下，上月底離開君陽金融（397）旗下君陽證券，已經返緊新工，工作性質相近，即係都係證券行啦，點知轉頭，君陽噚日一早登曬報紙，話已經主動終止同鄧聲興嘅僱傭合同，上市公司夜晚再出通告
，加多句話「鑒於（鄧聲興）表現不如人意」所以分手，講得好白囉！
君陽喺通告表示，鄧表現不如人意，「與集團增強及擴充本集團所提供受規管活動的計劃不相符」，所以終止佢擔任君陽證券及君陽資產管理董事總經理嘅營運角色，不過君陽都好有禮貌，成份通告都稱呼鄧為「鄧博士」，又話佢仲係上市公司執行董事。
鄧：不影響市場對自己評價
晚上KENNY向華華指，「自己表現見仁見智」，每一方衡量標準不同，上述聲明不會影響市場對其一貫評價表現。
君陽近排出曬名，主要因為佢被獨立股評人David Webb點名，成為「謎網50」（50隻不能沾手股份）之一，之前又有傳君陽係監管機構重點調查對象之一，家陣又話換人，咁都未完㗎，另一隻「謎網股」集成（1027）早前計劃以換股方式收購君陽。
君陽新任行政總裁胡偉亮噚晚接受華華電話訪問時，指對方係敵意收購，佢話君陽已經易手，新大股東蔡振忠乃珠寶商，換曬管理層，就係想一心一意想做金融證券生意咁話。至於點解鄧聲興仲係上市公司執董，據了解可能同集成正提出收購，公司唔可以𠵱家換董事有關。
李華華
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com