港交所努力交功課
2017年12月13日
美國總統特朗普喺中東掟炸彈，承認耶路撒冷係以色列首都，搞到全球回教徒強烈不滿，紐約又有恐襲，不過個炸彈流流地無炸死人，無礙美股表現，杜指上日輕微高收。
港股昨日早段彈上29000點後開始有壓力，指數反覆。有中環茶友話，如果無乜需要，聖誕放假都唔會去美國啦。美國挑起中東
敏感的傷疤，地緣政治緊張升溫，油價上升，三桶油都造好，呢樣嘢對正尋求上市的沙特石油公司沙特阿美都有利。
沙特以產油立國，依家正準備將國營石油公司沙特阿美上市。沙國政府希望呢間公司市值可以去到2萬億美元，即係等如3間騰訊(700) 。不過，投行就認為在全球環保潮流盛行，各國先後推出大力拓展電能車時間表，石油業依家好有夕陽行業的味道，或者呢個亦係沙特阿美要上市的原因，所以估值可能做唔到咁高，大約係1萬至1.5萬億美元咁上下，就算係咁，都會成為全球最大上市計劃。至於沙特阿美會係邊度上市，紐約、倫敦、香港都爭緊。茶友笑言，特朗普喺中東咁搞，好似係對回教徒不敬，但就對油價有利，對沙特阿美上市有利，咁沙特會唔會投桃報李，對去紐約掛牌秤先啲呢？
力爭沙特阿美來港上市
美國喺中東影響力毋庸置疑，不過，港交所(388) 始終唔甘心呢塊肥肉就咁溜走，所以高層呢期頻頻出動，鼓其如簧之舌，希望游說沙特阿美來香港掛牌，若然成事，咁就多左間超級公司在港上市。有人會問，美國係大隻佬，軍事外交筋肉咁發達，香港點同佢爭？港交所的說詞係美國出名多官司打，尤其興集體訴訟。喺幾年前美國政府通過左法例，容許公眾就911襲擊向沙國展開訴訟，呢條法例本來前總統奧巴馬都唔贊成，一樣阻止唔到法案通過，將來若然有人要打官司針對沙特阿美，特朗普一樣愛莫能助，所以沙特係咪應該將國家最大財富擺係美國呢？
美國上市公司法律風險大係人都知，當年阿里巴巴去美國上市，都好驚會中招，但到o依家都無事。事後解釋，就係美國佬有好多錢要買嘢，咁咪唔郁你住先。美國佬錢字掛帥，對拉攏沙特阿美同樣不遺餘地，所以「紐倫港」鬥法，始終紐約勝算大啲。港交所高層就算博到盡，其志可嘉，成功機會就不宜過份樂觀。由港交所呢期大力拉攏沙特阿美嚟香港，特區政府都有幫手。茶友話，呢屆政府似乎對港交所幾友善，唔單止爭取大型外資來港出力，對放寬同股不同權等問題上，都企左係港交所呢邊，對佢地做生意有幫助。
A股受壓 騰訊又軟
從經營上嚟睇，港交所今年都好左，無論新公司上市同每日交投都增加，估計業績會繼續改善。不過，過往大媽愛買港交所，概念係過水濕腳，生意食硬，但呢期潮流興金融科技，被視為有舊經濟味道的港交所就唔係咁得，變左落後股。睇番佢o依家市盈率48倍，息率跌到去1.6厘，茶友話咁嘅估值已反映佢係兌現緊之前獨食股市生意的概念，佢交到功課，股價撐住已經好彩，仲講話想攞彩，呢個就係概念股先有得炒，交功課股最多就係要嚟揸嘅殘酷現實！
A股昨全日受壓，拖累港股表現，午後跌勢更進一步加劇，騰訊(700) 及平保(2318) 同樣受壓，合共佔恒指131點跌幅，恒指收報28793，跌171點，跌穿50天線(28811) 。周一推動恒指的藍籌股，周二有部份回吐，騰訊回吐3%收報393.2元，拖累恒指86點跌幅；平保同樣下跌，收市下滑3.3%報78.65元，兩股合共拖低恒指131點跌幅，成為領跌股份。
陸羽仁
金融High Tea 舊文
來源 source: http://hdfin.stheadline.com