收市閒情 - 千頌C 2017年12月13日
收市閒情：輸錢關「年輕」咩事
■《股票傳心師》一個月輸三成，其實唔係全買細價股。
正所謂睇人GG最開心，醫生以外，呢期財圈比較多人講，就係《股票傳心師》一個月輸三成。「嘩！唔係呀化，咁廢？」「咁燈？改名股票傳燈師啦」。輸錢被人笑，一沉百踩，人之常情。不過，成件事最無辜嘅一定係一班年輕人。
一副老前輩Mode嘅阿飛，噚日一篇專欄，劈頭話傳心師輸錢，「反映出年輕一代炒賣的最大毛病，欠缺耐性太心急，大市上上落落之間，組合就受了重創。」疑似長輩嘅經驗之談，袋錢入你袋，作為後輩嘅的當然要聽。今日我仲好好綜合多年來，各前輩嘅教導。其實，教人炒股票，好簡單。
你唔買股票，就話點解你唔肯踏出一步；
買大價股，就話後生仔，本少就咪保守；
到你買細價股，就話你太心急，要學畢菲特價值投資；
你做曬功課，買隻二、三線股，就話你揀次貨，有大價唔炒；
你捱緊價，問點解唔識止蝕；
如果你真係止蝕，你就係冇耐性坐貨；
你真心信隻股會升，買正股，話你點解唔學炒衍生工具；
你十萬蚊，拎兩萬去炒衍生工具，就叫急功近利，有錢就任性；
佢十萬蚊，拎兩萬去炒衍生工具，就有注馬控制唔怕輸；
假如你賺錢，你係一鋪半鋪死好命，遲早輸返曬；
假如你輸錢，你話唔腳踏實地，冇技術唔好學人炒，抵死！
到你真係決定金盆洗手唔炒，就話你經唔起考驗；
到你炒股儲到錢，就話：你早幾年炒樓就發埋達啦
老前輩話，「年輕人炒股票追求快靚正，要用最短時間去追趕李嘉誠。在起點已經先看終點，而最普遍的第一站，當然是上車置業的首期，於是乎十萬本錢在手，就想二十倍奉還，賺至少二百萬回來。」
當然買股票係要「有耐性去修練技術」，至於買細價股、買衍生工具，大家可以睇成好高騖遠。冇錯，好多年輕人係真係想快靚正嘅，原因，正正係因為呢個年代冇舊時咁正。以前10萬蚊，做到首期買到樓，可以快樂過生活；依家10萬蚊，想資本增值最多係炒股做生意，然後呢，你仲要拼命去生存！
即係咁，本身有千萬身家，我都識腳踏實地去收息，印印腳唔使做啦；不過，但好多時後生仔，連第一桶金都冇，份糧又猛猛緊，又有咩資格學人講耐性？
其實，時代唔同、起跑線唔同，講炒咩都好，根本只有贏錢同輸錢之分。硬要將輸錢原因，扣上「少年你太年輕」罪名，前輩們，點對得住年輕時贏錢嘅自己？
P.S.唔係幫傳心師門開脫輸錢罪命，輸咗就係輸咗。不過，傳心師係咪真係衰急功近利買細價股？其實可以睇嚇佢哋過往嘅持股，分別有中海油（883）、長汽（2333）、閱文（772）、中興（763）、平保（2318）、金界（3918）、香港電訊（215）、市值比較細嘅，就係摩比發展（947）。當然，仲有輸得最慘烈嘅，靶已打嘅騰訊牛。
千頌C
千頌C
收市閒情 - 千頌C 舊文
來源 source: http://hk.finance.appledaily.com