【機會嚟喇】今年一齊坐穩啲（飛雲）（第158期）
2018-1-4 15:32:27
話咁快，2017年經已結束，又來到新一年，在此先祝福大家，2018年大家都有運行，齊齊在這一趟大牛市當中，贏個盤滿砵滿！不過最重要都係身體健康，生活愉快！
踏入2018年，港股便即刻大發神威，恒
生指數甫開市已經重上三萬點關上，其後更加愈升愈有，最終大升596點，以全日最高位30515收市，不僅創出5年以來的最佳開局，更加創出了10年新高，而大市成交金額經過之前兩星期的低迷過後，亦終於重返千億元以上的高水平，達1268.5億。
事實上，港股自上周將11月下旬的下跌裂口全數補回之後，經已可以確定之前的調整已經完成，可以重展升浪。而我之前，也已經講過，港股今次的升浪是未玩完的，因為大把人未入場，大把資金未入市。當陣時，市場上亦已經有不少人轉軚，話個市玩完，有排跌！咁結果係點呢？2017年，可能大家仍然有疑問，不過，一來到2018年，相信好清楚啦！
是的，事後孔明人人識做，不過，寫專欄就有一個好處，就係所有嘢白紙黑字寫得清清楚楚，尤其是而家有互聯網，上網一查，邊個講過乜，一查就知，唔到你唔認！
我之所以認為今次升浪未完，都係用一啲好傳統、好民間嘅睇法，無經過什麼高科技、高技術含量嘅方法！咁靠唔靠譜呢？其實，做咁多年人嘅經驗話畀我知，其實，呢啲民間智慧，往往都係最靠譜嘅方法，今次就又係一個例子！
咁大家可能會問我，今年目標睇幾多呢？對於呢個問題，我自己就覺得意義主要係在於指引大家何時離場，而唔係以此作為贏錢嘅目標！暫時來講，我都仲未有一個好明確嘅目標，不過幾肯定嘅係，今次應該可以升穿2007年「直通車」帶來的高位，三萬二係基本！以比高位高一成計，先睇三萬五！
好老實講，2017年的大升市中，可以講話係大股當道，騰訊控股（00700.HK）、滙豐控股（00005.HK）、友邦保險（01299.HK）及中國平安保險（02318.HK）等等，全部威威！之但係，要吸引到散戶入場，還是靠細股，因為大家都認為，要大升，都係要靠細股！所以，如果相信今年會係牛市三期的最終派對，細股狂潮一定會到來，細股一定會發威，倍升股肯定陸續出現！在此奉勸大家一句，如果揀中心水細股，就要好好坐穩，迎接即將出現的細股大升浪！
機會嚟喇 - 飛雲 舊文
來源 source: http://www.winmoney.hk