財路：百仕達兩年逢一潤
■洛克·外灘源明年完工同全面開業，百仕達等緊肥仔增值。互聯網圖片
百仕達（1168）由上年9月高位，一個唔該，半年插咗50%，呢隻股，兩年逢一潤，再插兜底，長短棍。百仕達上年尾手頭現金25億元，借款7.5億元，淨現金17.5億元，都仲講緊係現金牛。
又特別地方，係
集團待售投資度，多咗近48億元，到49.7億元，呢版投資，主要係反映集團揸住眾安在綫（6060）證券投資。又上年尾，百仕達宣佈同眾安信息技息訂協議，合作發掘金融科技同保險科技投資機遇。百仕達由靜咗好耐，到呢期開始有動作，著手新經濟保險科技相關瓣數，若果順風順水，可以煲出個未來。
唔理呢瓣住，百仕達家陣仲揸住兩個主要內房項目，包括位於上海外灘「洛克·外灘源」同上海長寧區「寧國府邸」。前面一個洛克外灘源，成個項目明年完工同全面開業，後邊寧國府邸亦正進行庭院精裝修、外立面改造同整體配套工程。呢兩個項目，已經到埋尾階段，又項目位處黃金地段，百仕達係等緊肥仔增值。百仕達到上年尾NAV2.7元，現價0.91元，PB得0.3倍，以內房計，仲係叫抵，又隨住眾安同上海項目增值反映，百仕達PB仲低。
百仕達兩年一潤，股價喺2015年5月見1.7元調整，再上年7月開波，見8月1.97元。呢轉趁調整，吼百仕達落番對上兩年橫行底0.74元兜底，長短打，一注博好似上年爆升，一注炒上落，到1蚊邊位食糊，百仕達PB仍然得0.3倍，就算計短打呢注，潛在回報率35%，已經有魚有肉。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com