借孖展抽股要防險
2018年04月24日
市場近日觀望氣氛濃厚，特別係美國將矛頭指向高科技公司，令投資者戒心增加，雖然美國擺出仲有得傾的姿態，但大家都唔敢太樂觀，加上流入北水有退潮跡象，所以審慎策略成為主調。
喺呢個氣氛下，平保(2318) 分拆好醫生上市，雖然孖展仲算吹得幾熱
，但感覺已無復閱文(772) 上市時氣場咁勁。
好醫生初步反應有熱度
正名叫做平安健康醫療科技(1833) 的平安好醫生昨日開始招股，集資最多約87.7億元。多間銀行券商紛紛推出優惠吸客，有市場消息指，多間券商已獲預訂大量孖展額，甚至聲稱孖展額已借爆，或按情況加額。本地大銀行提供孖展成數高達九成，年利率低至1.5%，大家期望悶市有胡食。
炒作新股去年最勁係閱文，佢上市升幅勁，加上散戶分配有着數，所以入票申請者獲利幾和味，跟住另一隻好嘢係希瑪眼科(3309) ，入票申請回報都好高。去到今年的超購王毛記葵涌(1716) ，雖然掛牌升幅驚人，但因為超額倍數太多，好多老散申請唔到，可能連手續費都蝕埋，所以唔係咁好分頭。
除左呢幾隻風頭躉，次一級的熱門新股好似易鑫(2858) 、雷蛇(1337) 、凱知樂(2122) 都先後破底，當中凱知樂屬於舊經濟玩具股，佢上市時有幾隻大股一齊，本來初期吹出嚟反應唔錯，但跟住就跌飛，最後本港發售部份錄得超額認購11.3倍，首日掛牌短暫時間見過高位開1.82元，但就低報1.47元，較上市價1.5元跌左3.9%，更加悲慘係如果無把握機會跳車止蝕，昨日佢股價已跌至0.74元，跌幅超過一半。
同佢一齊招股但反應勁好多的新經濟股易鑫(2858) ，公開發售部份獲逾30萬人認購，超購559倍，以每股7.7元上限定價，凍資3820億元，成歷來第十大凍資王。不過，佢股價喺幾個交易日後已經破底。昨日易鑫收報4.22元，較招股價下跌超過四成。
從幾隻超購王掛牌後走勢，閱文係科網新股上市高潮，之後的雷蛇、易鑫開始走下坡，若然唔能夠把握高位獲利機會，咁就有可能輸錢。好醫生O依家招股，市場唱到咁好，如果用實資去買都無乜所謂，但如果係用孖展去抽，咁係咪應該要預佢認購反應同掛牌表現，有可能會進一步冷卻，咁至穩陣啲呢？
平安好醫生係平保分拆出來的互聯網醫療平台，資料顯示截至去年底，註冊用戶逾1.9億名，數字強勁之餘，公司連續三年虧損，去年虧損10億元人民幣。今次佢發行1.6億股，香港公開發售部份暫定佔6.5%，國際配售則佔93.5%，集資額達87.7億元，每股招股價介乎50.8元至54.8元。由於佢集資額唔係細，所以掛牌後表現，都要睇市場對佢接受程度有幾高。
散戶用孖展抽新股無得抽飛，又要孖展息，轉身唔係咁靈活，所以要特別留意市況，旺市時跟紅頂白，波動市就要警覺性高啲，考慮埋短期市況。昨日港股下跌之餘成交又少，恒指收造30254點，跌163點；國企指數收報12000點，下滑54點，成交減至只有882億元。平保(2318) 有分拆沖喜，股價只係逆市微升0.67%，收報82.05元。騰訊音樂有傳下半年上市，估值更突破250億美元，不過騰訊股價創今年收市新低，收市再度失守400元關口，報394元，跌1.55%，拖低恒指約43點。海南省加強樓市調控，實施全域限購，消息拖累內房股，中國海外(688) 、萬科(2202) 及華潤置地(1109) 分別跌1.92%、2.13%及0.52%，至於海南業務比重較高的雅居樂(3383) 則跌5.94%收市。
港元拆息七連升
科技股舜宇光學(2382) 繼續急挫7%，收報132.7元；瑞聲科技(2018) 跌2%，收報119元。喺咁嘅環境下新股借孖展，另一個要小心因素係受資金供應影響，呢排港元拆息持續上升，與供樓按息相關的一個月香港銀行同業拆息(HIBOR)連升七個交易日。財資市場公會資料顯示，昨日一個月HIBOR升至1.0471厘，高於上周五的近0.975厘，為1月4日以來高位；隔夜息則升至0.15厘，呢樣都要留意。
陸羽仁
金融High Tea 舊文
來源 source: http://hdfin.stheadline.com