操盤手劄記：放下「芯」情睇獅子
■息口趨升，銀行股有睇頭，匯控獲大行上調評級和目標價。資料圖片
警號！美國債息上周三起抽升，10年期債息觸及3厘冧市警戒線，美股期貨則繼續下跌。本來，根據傳統理論，作為避險資產嘅債市下跌（或債息上升），代表經濟轉強，利好股市，點解股市又跟住跌呢？事
實上，聯儲局上周三發表嘅褐皮書，正顯示經濟向好。
喺金融市場，經濟係滯後指標，金融資產反映嘅則係預期，用滯後指標去睇，短期會有誤差，長期先會修正，短期主導市場嘅必然係資金同流動性。債跌股升，隱含嘅預期係資金輪動；債跌股跌，隱含嘅預期則係流動性收縮。事實上，全球息口趨升，流動性收縮係大勢。
市場預期，美國有45%機會今年加息4次。至於中國，市傳人行打算准許銀行提高存款利率浮動上限，即係加息。環球流動性正在收緊，加上貿易戰升級為科技戰，股市將會更形波動。港股周一收30254，跌163點，若果三萬關失守，有機會下試月初低位29500水平。
講番貿易戰，戰線已由加徵關稅轉到制裁企業。美國向中興（763）發出7年封殺令，點解係7年？皆因7年之後係2025年，《中國製造2025》收成之時。月初美國開出嘅關稅清單，正係瞄準《中國製造2025》嘅高科技產業。此外，中興、華為、聯想（992）又被點名「經濟間諜」。
科技冷戰白熱化，依賴美國市場嘅科技股，不宜沾手。中興「芯」痛休克，中國科網巨頭BATJ──百度、阿里巴巴、騰訊、京東，上周末就喺數字中國建設峯會聚頭，大談「中國芯」。不過，芯片股壯大需時，現時息口趨升，有加息話事權嘅銀行股更有睇頭。
美國債息、拆息趨升，加上新股抽資，本港拆息全線上升。瑞信上周就以金管局接錢、拆息抽升、息差擴濶為由，上調匯控（005）評級同目標價。該行預計拆息每升1厘，匯控淨利息收入就升3%、稅前盈利則升4%。匯控現價77元，走勢呈現杯柄突破。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com