操盤手劄記：宮闈劇投資啟示
■A股入摩，建行係外資重倉之選。資料圖片
上周五，喺美國貿易代表訪華前夕，美國突然向歐盟、加拿大、墨西哥開打貿易戰，唔排除係向中國施壓嘅手段。最新形勢係中美貿易談判取得進展，消息刺激中港股市殺上。不過，中美貿易談判同美朝核武談判一樣，五時花六時變，估每日
行情，等如買大細。
世界盃未開波，茶記晚市就播大台套宮闈劇，以為妃嬪最養眼，殊不知女官更搶眼。尚宮局四司，分別由羅霖（1991年亞洲小姐冠軍）、張慧儀（1992年馬來西亞怡保區華裔小姐冠軍）、康華（1994年參選香港小姐）、張文慈（1996年亞洲小姐最完美體態獎得主）飾演。
四人都已四、五十歲，但比起班青春少艾並唔輸蝕！就似港股咁，近排舊經濟股嘅表現，比起新經濟股更省鏡！皇帝後宮有尚宮局打點，我哋嘅投資組合亦可借鏡。劇中尚宮局統領四房——司珍（首飾）、司製（衣服）、司膳（膳食）、司設（陳設），相對有咩股份呢？
戲劇同歷史，始終有出入。事實上，唐朝女官設有六局——尚宮、尚儀、尚服、尚食、尚寢、尚功，司膳隸屬尚食局，司設隸屬尚寢局，司珍同司製則隸屬尚功局，而非尚宮局。講故唔好駁故，總之，顧名思義，珠寶、服裝、飲食、日用品股都可考慮，尤其具內需消費概念嘅。
順帶一提，今年當旺嘅醫藥股，亦屬尚食局嗰瓣。不過，我對源自唐代「櫃坊」嘅銀行股更感興趣。唐代未有紙幣，商人到處行商要帶大量銅錢，既麻煩又危險，櫃坊就代客商保管，商人需要用時，以「憑貼」提取，類似存摺；又可以「飛錢」跨地提取，類似匯票。
言歸正傳，隨著A股入摩，大型內銀股如建行（滬：601939，港：939），會係外資重倉之選。睇內銀首季業績，建行淨利息收益率改善最明顯，比舊年擴闊14點子至2.35%。建行資產負債表強勁，可長線持有。該股現價8.15元，走勢呈現區域上軌突破。
割柑人
本欄逢周二刊出
割柑人
操盤手札記 - 割柑人 舊文
來源 source: http://hk.finance.appledaily.com