大棋局：特朗普反口真正目的
■特朗普看似翻來覆去，其中一個目的是藉由反覆揼中國心口，要中國買美國頁岩油及天然氣。 資料圖片
特朗普方唐鏡上身，一時話貿易戰有得傾，轉頭反口關稅照抽；一時話放中興（763）生路，轉頭傳加大罰款，彈出彈入如入無人之境。
貿易戰把握一件事我
哋就能明白：美國原油產量急升至每日1,060萬桶，已經超越沙地及俄羅斯成世界第一，沙、俄兩國每日產油量在1,000萬桶上下。美國成為全球第一產油國，啲貨邊個接？只有中國及印度啃得落，尤以中國畀得起靚價。
因此貿易戰無論如何演變，其中一個核心都關乎能源。用西方哲學講法，美國變成能源出口大國為情勢本質，特朗普嘅打法只係手段，用中國哲學講法係體用，用佛學講法係性相。而當中一個關鍵，係美國準備將石油美元迴路扭轉逆行之際，中國企圖趁空隙搶佔東亞石油定價權。
炒期貨要先明白benchmark price，石油由於每地出產質量唔同，所以主要睇密度同含硫量兩個標準，低密度、含硫量低就係靚嘢。
現時世界有三種油作為石油嘅benchmark price，分別係美國WTI、北海Brent及中東阿曼原油。全球石油主要以三隻油價為benchmark price，然後按自身質量去定價。
石油定價美國玩曬
WTI在芝加哥商品交易所玩，Brent在洲際交易所玩，阿曼原油在杜拜商品交易所玩。但杜交所其一股東係紐約商品交易所，其原油合約由紐交所一手設計，結算亦係美元，所以世界三大石油benchmark price都係美國玩曬。
當石油美元迴路逆行時，原本作為石油美元代理人嘅中東國家就頭痕。中國看準時機，想趁此機會叫中東國家賣油畀中國以人民幣結算，上海國際能源交易中心今年推嘅石油期貨，其規格即主力迎合阿曼原油及俄羅斯烏拉爾原油質量，目的在搶佔亞洲交易時段東亞石油貿易嘅定價權（東亞主要入口阿曼原油）。
豐臣秀吉死後，德川家康發動了三場戰爭。第一場關原之戰，藉由挑動豐臣家文武派鬥爭，令忠於豐臣家嘅諸侯、大臣折損大半；第二場大阪冬之戰，打到一半德川講和，條件係豐臣家要將其根據地大阪城護城河填平，並拆毀副城；第三場大阪夏之戰，直接攻陷大阪城，豐臣家滅亡。
特朗普看似翻來覆去，其實只有兩個目的：
其一，藉由反覆揼中國心口，要中國買美國頁岩油及天然氣。
其二，當中國被逼大手買美國能源時，其人民幣定價嘅石油期貨便廢咗一半，不再具威脅性。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com