智取大市：零售股低吸良機
■劉鑾鴻喺3月剛爆發貿易戰之際，向卡塔爾增持逾兩成利福股權。 資料圖片
要數中港樓市同貿易戰對於中高檔零售業嘅影響，似乎樓市影響力大得多。
現時香港班中產好鬼矜貴，連做緊公公婆婆嘅都學識講organic，放假就去Sogo、city"super買日本嘢或外國嘢，
對於食品價格敏感度低。呢班食好著好嘅中產，有強大消費本錢，因為個個至少揸住自住樓，衣食無憂，但可能返工做到隻狗，於是人一世物一世，更加要消費。
即使貿易戰燒到中檔食品，令每件貨品加嗰一兩三蚊，但都難以改變呢種趨勢。反而樓市爆煲，令租金收入大減，財富效應消失，逼中產降呢，先會扭轉呢班人嘅消費模式。南下消費嘅大陸人，情況亦相若。不過，喺人行收回棚改貸款審批權、同埋「娥六招」嘅推出，似乎預示中央未覺得中港樓市有即時爆煲危險，反而驚樓市繼續癲。
本地零售股近期跟隨大市回落，莎莎（178）唔見咗今年升浪嘅一半，如果相信零售上升周期未受動搖，近期係逢低吸納時機。喺3月剛爆發貿易戰之際，細劉向卡塔爾增持逾兩成利福（1212）股權，自此股價扶搖直上。近期受市況影響跌唔少，但近兩個禮拜利福每日回購百幾萬股，令股價喺跌市之中回穩。細劉力撐之下，利福似乎喺波動市況之中，成為較樂觀嘅一員。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com