金手指 - 孫柏文 2018年10月23日
金手指：打直行入斬件運出 - 孫柏文
卡舒吉在沙地領事館內遭肢解事件，鬧到滿城風雨。 資料圖片 適中字型 較大字型
相信呢期大家都同孫柏文一樣，覺得天下大亂。真係唔知究竟係世界亂咗，定係根本一路都係咁亂，只係因有互聯網嘅興起，好多以前會㩒得住嘅消息，今日必爆得出。例如，同王儲反咗面、投奔西方嘅沙地權貴卡舒吉（Khashoggi），之前打直行入沙地註伊斯坦堡嘅領事館後，被斬件運出，鬧到滿城風雨。如果係廿年前，就算土耳其唔妥沙地，土耳其政府手上有片、有證據K君被殺，放料畀自己傳媒，最多都係令土民愕然。
今日傳片之易，全球傳媒跑click rate，世界網民爭like下，連當今世上最為所欲為嘅政權，都搞到倒瀉籮蟹。連賣好多貴價軍備嘅美帝，總統侵侵及佢啲馬，都出口話呢次斬件，極唔畀面之前出口撐沙地政權嘅人。
事態發展，比較難估。市場話，如西方世界迫得沙地太緊，王儲可能會玩嘢要石油減產。不過要我直線推斷，有如早排侵侵講過，沙地政權冇美帝撐腰，必眨眼咁快就倒台，所以沙地一定要死狗般做啲嘢。喺侵侵眼中，冇嘢比瘋狂產油，㩒低油價合心意。所以我諗單嘢過咗無耐後，就會見沙地產油量上升。
而最大得益者，會奇怪地係我的國。原因美帝近年啲頁岩油產量不斷上升，成個中東，包括沙地嘅最大客戶，變咗我國同胞。今次如果真係擺平靠增產，用跌到心寒嘅人民幣買石油，都可能會冇咁傷。沙地殺人，美帝發難，中國受惠。呢期，世界真係難捉摸。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com