【財演算法】VIX可以點炒？（蔡嘉民）
2018-10-23 9:06:11
上個禮拜有個訪問問關於VIX可以點炒，VIX絕對唔係一個簡單嘅產品，三言兩語好難可以解釋哂，所以決定用少少文字講下。因為VIX係講緊美國標普500指數嘅期權嘅引伸波幅 (IV) ，去俾人一個概念黎緊
個大市會點樣行，會比較波動，定係比較淡靜。初學者要留意VIX並唔係講緊個市最近點行，唔係一定要個市Chok左之後，個波動率指數先鬱，絕對可以喺個市唔鬱嘅情況之下，波動指數不斷變。所以，其實炒VIX係炒緊啲人點睇個市，所以玩法係去估啲人會點估個市。
炒VIX可以玩事件主導(Event driven)，喺大事件公佈之前: 例如Brexit咁，你覺得啲人低估左現時個波動率的話，可以喺Brexit前一星期買VIX。之後如果爆大鑊，啲人對引伸波幅嘅睇法重新調整，就可以獲利。又或者喺事件之後: 例如特朗普當選之後，你發覺VIX升左唔少，覺得啲人過度反應、過份恐慌，咁就可以考慮沽VIX。當市場人士冷靜過後，就可以獲利。
另一種簡單玩法係，因為VIX長期都有一個均值回歸嘅特性，所以唔可能會見倒VIX長期係50之上，或者10之下，因為大市嘅波動性一定會有一個範圍，所以如果見倒VIX係好極端嘅位置，就可以小試牛刀，做一做均值回歸嘅策略，搏佢會回調或者反彈。
咁有咩工具可以玩VIX呢？大分有3種，一係直接玩VIX future，既方便又快捷，唔洗計太多數，不過要留意玩緊邊一個到期月份合約。其次係VIX嘅Options，不過會有啲複雜，因為VIX options嘅定價係取決於VIX嘅IV，俗稱VVIX，所以係要估埋VIX本身嘅IV! 第三個方法，係玩VIX相關嘅ETP，例如VXX、SVXY、UVXY、TVIX等等。下次會講下點樣揀工具去炒！
財演算法 - 蔡嘉民 舊文
來源 source: http://www.winmoney.hk