先炒反彈 未來還看經濟
2018年10月23日
阿爺出招全面托市，A股大力反彈，推動港股急升，同一時間，沽空金額亦達184億元，反映彈得高又有淡友出來沽貨，在升市中暗藏風險。中港股市出現「劉鶴市」，喺副總理劉鶴出來唱好經濟，配合監管門戶透風，推動險資可以自行買股投資，又解決證券公司質押股份在跌市時遇
到的問題，A股昨日大幅高開，其中證券板塊升幅顯著，唔少股份升停牌。雖然證券股升幅驚人，但呢類股票跌幅累積比較大，跌得多自然彈得勁，但真正喺低位撈到貨賺錢者仲係少數。
證券股係對投資市場環境最敏感板塊，呢類股票要改變走勢，始終要等大市全面復甦。中央上周五開腔撐A股，內地股市應聲急漲2.5%，昨日滬指再下一城，重上2600點關，上證指數收報2654點，再飆4.1%；深成指數收報7748點，勁彈4.9%。
券商股跌得多彈得勁
港股受內地股市氣氛刺激上升，恒指重上26000點關，收報26153點，升591點，升2.3%；國企指數收報10490點，漲268點，成交1144億元。港股成交增加，沽空情況仲明顯，全日總額有184億元，沽空比率16.1%，沽空股份594隻。其中最多人沽空嘅係平保(2318) ，沽空額有15億元，佔8.3%；然後輪到盈富基金(2800) ，沽空逾14億元，佔7.8%。指數大彈，同時沽空都唔少，中環茶友問，中港股市急彈，前景點睇？
好明顯，港股昨日急彈同中央維穩護市有關。內地現時引資入市買股，對維持股價有一定作用，但究竟個市係彈完再散，抑或可以漸入佳境，都幾睇實際經濟表現。A股呢幾個月不斷探底，同中美貿易角力不斷升級有關，投資者擔心一波波衝擊會影響企業盈利，股市率先反映，所以內地經濟增長O依家仲有6.5%，股市卻先見今年低位，可以話股市超前反映未來衝擊。
現在中央救市，放水挺住股價喺一個方向，同時採取措施推動經濟，最大力度係醞釀減稅，市場傳緊對企業減稅規模會比美國還大。從美股喺減稅後屢創新高，令市場有少少期望。阿爺有心撐住經濟同股市，成交就好睇落實工夫點樣，好似中央想減個人稅，但財政部門研究計劃時，就收緊一啲灰色地帶，令部份人減稅後竟然仲要交多稅，呢個可以說是收稅部門慣性，但也令減個人稅效果大打折扣。舉個例講，好似特區政府想發展商加快賣樓，又想增加供應，於是推出空置稅，結果發展商投標出價會考慮影響，但做估價官員有無考慮呢？抑或仍然係保護賣地收益呢？可能就係因為咁，估價部門認為山頂地皮入標價唔到價，就流咗標。政府想增加供應，當然係唔理地價高低都應該成交，但做地政的官員有一貫成規執行，結果得出來的結果，就同最先設計未必一致。
阿爺撐市有待觀察
現時北京希望催谷經濟，支撐股市想法係清晰的，執行起來成效如何，仲有待觀察，不會一面倒睇好。我估內地股市也是反彈一段，就要唞唞，無咁快完全轉勢向上。另外據內地傳媒報道，證券商或與地方國資委合作，成立「類救助基金」幫助抵押股份的上市公司，紓解具有發展前景但暫時陷入經營困難的上市公司，重振市場信心。
港交所(388) 都升3.35%，收報216元。藍籌股普遍造好，中生製藥(1177) 跑贏大市，收升11%，報7.39元，為升幅最大藍籌股；吉利(175) 飆7.9%，收報15.12元；股王騰訊(700) 升3.3%，收報291.2元。
昨日三四線股唔少都有可觀升幅，早前提過可能炒賣產的香港國際建投(687) 遭大股東海航減持，股價愈沽愈升。據港交所權益披露，海航上周三(12日)以每股平均2.3元，在場外出售1.5億股香港國際建投股份，涉資3.45億元。
減持後，海航於香港國際建投好倉持股量，由73.74%降至69.31%。該股股價昨日就再升至2.26元，再升15%。個市一郁，就有人趁機炒一轉。
陸羽仁
金融High Tea 舊文
來源 source: http://hdfin.stheadline.com