【實力取勝】從前，陳承龍有本雜誌⋯⋯（陳承龍）（第204期）
2018-11-22 17:03:53
喂，大家好，在下陳承龍，我喺最後一期、第204期《港股策略王》，趕得切返嚟。小弟病呢兩三個星期，好多fans都喺facebook send message畀我，仲有好朋友嘅w
hatsapp、wechat、telegram message，我用返手提電話後，一一睇曬所有慰問，多謝大家，我返嚟啦。
呢次大病令我諗到、體會到好多嘢，有機會就再講，今次期數有限、字數都有限，集中講呢本可能係本地史上最破格嘅財經雜誌，第一句想講嘅係「好唔捨得本書，但都要面對現實」。
2014年年尾，小弟同幾個志同道合嘅朋友，一齊搞咗《港股策略王》，故事喺唔同場合講過N次，唔再重覆。反而，好想講講當初每期趕稿嘅辛酸。第一代策略王Office，係喺中環借朋友啲office用，幢大廈係用中央冷氣，夜晚係熱到黐肺，但我哋趕書係星期二同三晚，嗰時每個星期有兩晚，少則7個多則10個人，逼喺一間冇冷氣嘅小小房間，一邊寫稿一邊排版，一身大汗，好多時仲要搞到通頂，而小弟喺當日嘅寫稿量都唔少，好多封故都係自己包辦（主要原因係我唔寫就冇人寫）。趕完稿，第二日又要起身炒股，仲要做電台電視，都幾瘋狂，不過只要有股炒，小弟就會有精力，一啲都唔覺辛苦，依家諗返轉頭都仲幾過癮、回味。呢段2014年12月到2015年7月嘅時間，小弟一世都記得。
香港人，從來都唔怕辛苦，只會係怕無機會。
但冇辦法，科技帶動時代轉變，舊經濟沒落，新經濟興起。小弟都不斷搞直播，由一條友搞到變成個電視頻道，喺直播業務日漸成熟之下，此消彼長，印刷業務真係好難睇到前景。但細佬夠膽好自豪咁講，《港股策略王》係呢幾年最成功、最有創意、最貼地、最佳嘅本地財經雜誌。
幾年後，如果有新嘅朋友，第一次認識陳承龍呢個小小嘅股票老散，可能會係「從前，陳承龍有本雜誌，依家，佢有個好成功嘅網台、電視頻道。」一個卑微心願，希望各位觀眾、各位手足同埋尊貴嘅廣告客戶幫細佬完成。最後，都係嗰句，我哋「贏就一齊贏」，無論牛市熊市或者東市西市，每一日做任何嘢都要努力做到最好。
多謝大家。MyTV 606台、YouTube同facebook見。我愛大家。
實力取勝 - 陳承龍 舊文
來源 source: http://www.winmoney.hk