兩個左右股市的男人
2018年11月22日
股市永遠有驚喜，美股杜指隔晚大跌551點，中港股市則上演單日轉向，港股開市已跌唔多，下半場更轉升，最後逆外圍之勢升131點，如此表現實在令人出人意表。
華爾街呢排風起雲湧，最強嘅科技股同傳統股輪流失守，前晚又到零售股被插。昨日晨早未開市，中環茶友話點睇？
陸羽仁回應要救美國個市就要睇兩個男人。呢兩個都係美國人，一個係特朗普，另一個係鮑威爾。特別之處係兩個美國人愈有信心時，對中港股市愈不利，相反佢哋無信心，對股市就好啲啦。
美股下跌利吹鴿風
特朗普對港股嘅影響，最直接係來自貿易談判。中國立場好清楚，北京想達成協議，讓步方案已經擺咗喺枱面，中國可以一年買多幾百億美國貨，只要特朗普肯攞就水到渠成。前日傳出消息，美國航空母艦列根號會嚟香港訪問，特區政府視之為利好港美關係。實際上美國軍艦訪港，話事權喺中國，今年9月阿爺曾經拒絕過美方艦艇來港，現時批准美國航母來港，任由佢喺香港威威，雖然美國指揮官話唔代表乜嘢，但點都令人感覺到中美吹起一點暖風。
特朗普喺選舉之後，同北韓談判僵持，美國股市又持續下滑，對成日想搵好消息沖喜嘅特朗普而言，與中國達成協議，向國民表示「成功爭取」誘因不斷增加，所以美股愈插，反而市場愈會炒中美有貿易協議。
同樣地，聯儲局主席鮑威爾擺出鷹派姿態，若然美國經濟強勁，聯儲局下月加息機會就係百分百，而且可能加完再加。高盛預測美息要加五次，美股即時下插，但對香港而言，美股急跌造成負財富效應，有牽制聯儲局再加息作用。
咁即係話，華爾街吹淡風，對特朗普同鮑威爾呢兩個美國男人而言，都有「下馬威」效果，增加他們行一行鴿派路線機會。呢個理解唔係斷估，事實上當美股下跌，美國總統特朗普就已經急不及待，呼籲聯儲局減息，以紓緩市場對加快加息憂慮，美國債息同時稍為下降，亦減低港股跟跌力度。
受外圍影響，前日已經大跌嘅恒指裂口低開343點，相對美股而言算係跌得唔多，不久後更買盤增加，拗腰「V彈」，到下午三點A股回升收市，提振港股衝高，收漲131點，報25971點；國指稍為跑輸，收升19點，報10486點，成交稍為增至783億元。
今年搶閘大跌嘅科技股叻番次，騰訊(700) 先低後高，收市彈高2.8%，報289.6元。本港蘋果概念股回穩，高偉(1415) 收升2%，報0.98元；瑞聲(2018) 收升1.85%，報54.95元；舜宇(2382) 收升近2%，報77.2元。多隻科技股跑贏大市，美團(3690) 今日公佈業績，績前升4.7%，報59.7元；IGG(799) 收升2.4%，報9.6元；中軟國際(354) 收漲1.77%，報4.6元；小米(1810) 股價三連升，收升0.7%，報14.84元。
港股能夠逆流而上，股民有點執身彩巳感覺。要留意嘅係，雖然美股下跌，有利中美貿易談判同埋為加息降溫，但都要提防美股會唔會瀉出個股災，若然係咁，港股就鐵打都未必頂得住。另一方面，如果指數繼續反彈，等如係不斷消化中美達成協議消息，所以O依家買賣，都仲係要打穩陣波。
寶寶樹同程傳下限定價
正值市況波動之際，阿里巴巴及騰訊兩大電商巨頭分任股東嘅兩隻新股——寶寶樹(1761) 及同程藝龍(780) 前後腳招股。外電引述消息報道，兩隻新股均以下限或接近下限定價，同程藝龍發售價將定於每股9.8港元，接近招股價範圍9.75至12.65元的下限，集資約14億元，股份將於下周一(26日)掛牌，聯席保薦人為摩根士丹利、摩根大通及招銀國際。
兩隻新股大股東本來都係金漆招牌，可惜現在都失去光環，以下限價招股，頗有點海鮮價之感。有茶友覺得寶寶樹都有啲概念，正等緊兩間公司掛牌，到時有無平價買海鮮機會。
陸羽仁
金融High Tea 舊文
來源 source: http://hdfin.stheadline.com