智取大市 - 晉佳 2018年12月10日
智取大市：特朗普怕了嗎？ - 晉佳
特朗普遲遲未喺Twitter回應孟晚舟被扣留事件，取態比貿戰期間任何一件事情為審慎，可見其潛在嚴重性。 資料圖片 適中字型 較大字型
華為案拖累美股急挫，港股黑期星期五晚跌百幾點，跌勢冇美股咁傷。
之前貿易戰以至科技戰，主要由美國主動對中國發出攻擊，中國態度一直偏向被動，令市場覺得美國受損程度有數得計。華為案對中國嚟講係不能忍讓嘅屈辱，可能係逼中國態度轉趨主動嘅轉捩點，美股跌勢勁過中港股合理不過。中國企業管理層多年嚟海外經營難免打茅波，遊走於灰色地帶，各國隻眼開、隻眼閉，如今華為公主都俾人拉得，有可能令中國有錢人喺地理上同北美斷交，影響深遠兼難以估計。對美股嚟講，短期變數的確增加了不少。
目前美股主要指數都呈大波幅嘅下跌三角形，跌穿支持線嘅話，就有機會觸發新一輪美股基金贖回潮。加國拉孟晚舟一案，白宮開頭話特朗普不知情，似乎都覺得玩大咗，特朗普亦遲遲未喺Twitter回應事件，睇怕須摸清形勢再表態，取態比貿戰期間任何一件事情為審慎，可見其潛在嚴重性。
短期肯定係壞事，不過，玩出火，美國怕火燒後欄，加上總要預備2020年大選，都有可能加快逼到美國收歛，最終會否柳暗花明，並非無可能。當然，過咗呢段風頭火勢時間再說。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com