出得嚟行 預咗要還
2018年12月10日
香港及美國股市深受貿易談判及利息走向影響。美股大上大落，甚為誇張，美股杜指上周四因為華為太子女孟晚舟被捕事件，一度大跌784點，後來傳出聯儲局下一個議息會議喺加息方面將會「睇住先」(wait-and-see)，美股跌幅大幅收窄，最後只跌79點。美股上周四無
大跌，港股上周五亦企穩，只跌92點。不過，美股到星期五就大插水，杜指開市即下滑，收市大跌558點，上星期四不跌，翌日仲要大跌，真可謂「出得嚟行，預咗要還」。
美股大上大落與中美貿易談判形勢有關，美國總統特朗普與國家主席習近平在阿根廷會晤本來傾得唔錯，但同一時間，華為太子女孟晚舟就俾美國透過加拿大方面喺溫哥華拘捕。美國國家安全顧問博爾頓也有參加中美峰會，佢事後承認峰會前已知孟晚舟被捕嘅消息。白宮消息人士就大力吹風，話特朗普事前並唔知情。據說早喺今年8月，紐約州法院已暗中向孟晚舟發出拘捕令，只等孟晚舟踏入美國緊密盟友領土，就會採取拘捕行動。由於紐約係民主黨人老巢，令人相信民主黨靠害，拘捕華為太子女，唔想中美能夠達成貿易協議，因為在中期選舉，民主黨搞唔死特朗普，如果中美達成貿易協議，特朗普聲望大漲，好大可能成功連任，所以民主黨就搞破壞。
侵侵唱好 無助大市
特朗普對孟晚舟被捕事件似乎並唔支持，佢向來好鍾意喺Twitter發文，今次孟晚舟事件就隻字不提。諗落好正常，佢未必想喺呢個時候拘捕孟晚舟，以免破壞中美貿易談判，但事情已經做咗，o依家公開反對或者叫停，都會對美國造成很大的傷害，所以就只能閉口不談。不過，香港時間上周五晚約九點許，特朗普喺Twitter話：「中美貿易談判進行得非常好。」美股開市之前講呢啲說話，好明顯係想出口術托市，同埋消減市場對美國拘捕孟晚舟係有部署針對中國嘅感覺。
特朗普發帖嘅同時，多名白宮官員先後發表講話，搞到市場有啲混亂。先係白宮經濟顧庫德洛接受CNBC訪問時話，特朗普表示如果中美貿易談判有良好進展，可以考慮延長90日嘅增加關稅限期。庫德洛講話之後，杜指升咗100點。大約1小時之後，白宮著名鷹派的白宮貿易顧問納瓦羅接受CNN訪問，被問到如果貿易談判唔能夠90日內達成協議，美國是否會離場？納瓦羅回答，美國會按原定計劃增加關稅；此話一出，已經從高位回落嘅杜指，就不斷下跌。
就業麻麻 經濟不佳
白宮官員鷹派同鴿派混亂表述，加深市場恐懼。《街爾街日報》又報道，聯邦檢控官正計劃向中國的黑客提出檢控，指控佢哋攻擊美國科技公司網絡，報道亦令到市場擔憂會增加中美貿易談判嘅緊張。
上周五美國公佈11月非農就業新增職位15.5萬個，低過市場預期19.8萬個，令到市場對美國經濟前景憂慮。本來，就業數字唔理想，會減慢加息速度，對股市有利，但市場氣氛差，美股就順勢急跌。
美國現時擺出嚟嘅局係民主黨唔想達成貿易協議，怕會幫助特朗普連任。即使係特朗普團隊，當中都有鷹派同鴿派嘅矛盾，只有特朗普仍然希望中美能夠達成貿易協議。由於美國局面比較脆弱，中國亦唔想喺孟晚舟事件上做太大文章，雖然強烈要求美國同加拿大放人，高層領導並未曾出嚟喊話，似乎要保留空間俾中美可以繼續進行談判。中國將矛頭集中加拿大，中國外交部副部長樂玉成周六晚緊急召見加拿大駐華大使麥家廉，就加方拘押孟晚舟提出嚴正交涉，加方以應美方要求為由，拘押孟晚舟嚴重侵犯中國公民合法正當權益，於法不顧，於理不合，於情不容，性質極其惡劣。中方強烈敦促加方立即釋放被拘押人員，否則必將造成嚴重後果。隨後新華社同《人民日報》都發文狠批加拿大。
股市上落 波幅取利
照目前走勢睇，雖然中美貿易談判變數仍然好多，也未至於如市場估計咁壞，孟晚舟事件未到「打破交易」嗰種水準，特朗普同中國都想達成協議，只係未來變數會好多。美股已抹去中美貿易談判之後嘅升幅，估計港股亦會因美股下插而低開，如果恒指跌到25700點樓下水平，其實可以考慮分段吸納，希望博貿易談判會有好結果。未來90日仲有好多波折，股市會上上落落，唔適宜單方面睇好，亦唔需要睇得太淡，反而有機會喺波動中獲利。
另外周末公佈嘅中國經濟數據都唔太利好，對股市都有壓力。中國海關總署周六發佈資料顯示，以美元計，11月中國出口金額同比增長5.4%，增速較上月下滑10.2個百分點，進口同比增長3%，增速較上月大幅下跌18.4個百分點。當月實現貿易順差447.4億美元，較上月擴大107.3億美元
中國11月的進出口數字均不如市場預期，內地6間機構預測中值，預測11月出口同比增長約9%，進口同比增長14%左右，現實不似預期。分析師表示，進入四季度，之前怕貿易戰的出口搶運因素逐漸消退，中美貿易摩擦的負面影響逐漸體現出來。出口方面，雖然11月主要經濟體運行整體仍處於景氣區間，但均出現邊際收縮：歐羅區製造業PMI繼續回落至51.50，日本製造業PMI回落至51.80，美國Markit製造業PMI回落至55.40。好在新興市場需求以及貿易轉口因素帶來的出口多元化，加上內地加大出口退稅力度，畀出口帶來一定支撐。分析師指出，除關稅影響外，11月出口增速回落也有去年同期高基數的影響。目前中美關係出現重大轉機，雖然談判過程仲有不確定性，但大大緩解明年初中國對美國出口大幅下滑嘅風險。
出口回軟 通脹急回
出口回得快，通脹數字亦急回。12月9日，國家統計局公佈11月消費物價指數(CPI)同生產物價指數(PPI)數字。中國11月CPI及PPI雙雙回落，11月CPI和去年同比上升2.2%，預期係2.4%，上月前值2.5%。10月以來，非洲豬瘟加速擴散，導致疫情地區短期豬價加速回落，影響了CPI。PPI同去年比升2.7%，預期係2.7%，上月前值 3.3%，11月PPI還創下自2016年11月以來新低。
海通證券分析師姜超話，中國從通脹到通縮預期，正快速變化。今年一直到3季度，主流的觀點依然是在擔心滯脹，到了4季度，通脹預期突然消失了，取而代之的是通縮的預期。到10月份的時候，對通脹的擔心達到頂峰，當月CPI已經達到2.5%，已經達到過去5年的高位，似乎如果保持這個趨勢不變，2019年的通脹就可能會破3%了。
以商品價格計，從10月份峰值到現在，國際油價跌幅高達30%，國內鋼價跌幅接近20%，國內煤價跌幅接近10%，咁就抹咗呢啲商品今年以來嘅全部漲幅。預計未來兩個月嘅PPI環比將大幅下降，而12月嘅PPI同比漲幅或降至1%以下，到2019年PPI或將重現負增長。另外11月CPI已經回落至2.2%，預計到2019年CPI會重回2%以下，其中最低點可能會降至1%以下。雖然2019年CPI大概率仲係正增長，但如果PPI出現顯著負增長，那麼兩者加權之後的綜合物價水準或在負值區間，其實就是通縮了。
綜合數字來看，早前公佈的中國11月PMI已在50這條榮枯線上，如今出口增長放慢，通脹由高位回落，整體顯示經濟喺收縮態勢，短期令股市受壓。經濟唔好，內地有放水空間，降準減息會陸續來。
油組減產 油價急彈
上星期五較大嘅消息，石油出口國組織同俄國等盟國終於達成協議，油組國家每日將減產80萬桶，油組以外的盟國則每日減產40萬桶，合共每日減產120萬桶，符合市場此前預期的每日減產100萬至140萬桶之間。減產消息令到英國布蘭特期油升2.7%至61.67美元，當天高位曾見過63.73美元；紐約期油升2.2%至52.61美元，而當天高位見過54.22美元。
目前，全球三大產油國都在全力泵油，美國每日生產1170萬桶原油，達到生產高峰，上周更是首次出口量高過進口量；俄羅斯嘅石油產量達到前蘇聯時期後嘅高峰，每日出產1140萬桶；沙特生產亦創紀錄，每日生產1110萬桶石油。三大產油國大力增產，便令到有油價疲弱。上周末達成減產協議，相信一定程度上會穩定到油價。據石油研究公司估計，減產會令到明年第三季油產比較緊張，布蘭特期油會回升到每桶70美元，即較現價有13.5%潛在升幅，估計油股都會彈一彈。至於中期油價走向，可能仲要睇美國對伊朗制裁會否進一步推進，呢啲市場最大變數。
陸羽仁
金融High Tea 舊文
來源 source: http://hdfin.stheadline.com