笑到最後 - 高明 2018年12月24日
笑到最後：KOL之又愛又恨 - 高明
不少網民也有閱覽KOL專頁。 適中字型 較大字型
2018年將盡，今年其中一個大趨勢，係KOL或專頁已漸漸取代傳統媒體為吸收資訊嘅渠道。當然KOL唔係今年先有，但人人都開個專頁，而觀眾普遍接納呢個模式，廣告商亦投奔呢個行業，今年可算係定型嘅一年。
大眾媒體演化至個人傳媒，係一個自然演變，因為社會成熟，發展初期大眾嘅口味較接近，發展至今，人以類分，口味分得更散。不過，有別於傳統媒體寫錯會被圈起恥笑，KOL寫錯則多數被寬大處理，呢個先係令高明擔心嘅地方。
曾幾何時，高明以為互聯網提升資訊流通，真理越辯越明。
本來有互聯網要查證資訊已好易，而KOL係社會上最叻用互聯網嘅一群人，理應輕鬆查證。令高明大跌眼鏡嘅係，社交媒體興起，真相反而係：隨便寫一啲冇查證嘅嘢呃like先多人理，至於資料係咪準確則只係小眾關心嘅事，反正免費睇個專頁，睇嚟又只係尋開心，資料準確嘅話故事性就會打折扣，不如直接作故事，而觀眾亦會照單全收。
呢個亦解釋咗，點解全球所有人都話特朗普善變講嘢冇句真，但當佢出個Twitter話貿易戰有轉機或要求聯儲局唔加息，個市會信到十足十，例牌挾一下勁，然後真相一出又再度被懲戒。
因為KOL已經取代咗過去嘅「專家」，代替觀眾思考，而KOL同觀眾嘅距離更接近，基本上已成為網友，信賴程度比起過去專家更有效，對廣告商同政權嚟講，無疑係天大嘅喜訊。
網上睇留言，雖然有小部份人覺得現況有唔妥，睇KOL距離事實越嚟越遠。但存在必然合理，事實係：大多數嘅人，係接受唔準確嘅資訊，對事實是否準確並無要求。
即使你話睇專頁同Twitter勿認真，但無可否認已成主流，配合收益嘅傾斜，趨向準確嘅資訊似乎越來越難經營，要有心理準備，假新聞將會遍地開花，幸好股市最終都係現實主導，唔滿意假新聞亂挾個市，不如倒返轉做獲利。
高明
http://fb.com/bigricetea
笑到最後 - 高明 舊文
來源 source: http://hk.finance.appledaily.com