【大茶飯】指數基金年度回顧（青冰）
早幾日聽朋友講，話佢朋友近日開始買入SQQQ，青冰雖然沒涉足美股市場，但一看QQQ就知是Nasdaq 100的指數基金，咁SQQQ就知係沽空該指數啦，跟住再用心睇，啊原來隻SQQQ係有3倍槓桿的，12月美股跌咗咁多，仍然在這些水平做淡，的確係勇，而較
令青冰有興趣的是，朋友的朋友過往極之看好科技股，即使亞馬遜二千銀時都唔認為佢會跌，咁究竟係咩驅使佢咁狠於造淡呢？
翻查最新的數字，Nasdaq 100指數今年累跌5.5%，今年仍錄得升幅的股票有33隻，最曳表現嗰廿隻，當中有3隻中概股，百度、攜程及京東，不過以12月的表現來說，這個指數就非常差喇，單月跌15%，全個指數今月只有兩隻升，一隻係晶片股博通，另一就係網易，後者今月已升7%，尤其上周更逆市連升兩日，似乎春江鴨一早已知內地新遊戲恢復審批之事。用技術走勢看科技股是轉弱了，亦從高位回落了兩成，稱為技術性熊市，相信朋友的朋友都係睇中這點，博個指數由盛轉衰有排跌。
而太平洋的另一邊，去年最多人推介的南方A50 ETF(2822)，係追蹤富時A50指數，今年累跌了21%，當中只有4隻股票升，分別係做豉油的海天味業、上海銀行、中鐵建及海螺水泥，後兩者在港的H股皆升，中鐵建(1186)今年仲升18%添。其實青冰唔太明白，點解睇好A股就要買這個ETF，除了比較易入腦之外，真係麻麻地，不是成份股的素質問題，只是指數內有54.7%金融股，你買落去咪即係博金融股向上而已，都係嘅，銀行乃百業之母，佢好A股一定好，係唔錯得曬，但平保A股佔12%，招行A股佔7%，兩者加埋都已經兩成了，近期兩隻A股皆連跌六天，這亦是近日A50指數明顯跑輸畀上證的主因。
而經常被青冰抽水的恆指，今年累跌14%，反而升的股仲有13隻，比例上的確不低，當中一定有中電(0002)、煤氣(0003)及領展(0823)三大神股啦，中海油(0883)及中石化(0386)都仲升幾巴仙，唔知頂唔頂得到完場，最驚訝的反而是華潤系有兩隻上榜，分別係成份股升幅最大的華潤置地(1109)及華潤電力(0836)，真係跌曬眼鏡。
現時ETF多如天上繁星，睇好某個概念或行業，都一定有ETF，但暫時似乎只限美股市場，港股發展的確係差勁，原因或許港交所只關注IPO吧，投資者太多選擇唔太好嘅，焗佢地玩穿底IPO就啱架喇，係咪？
—
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com