貼地風管 - 鄭發 2019年1月21日
貼地風管：請管理好「反芻思考」 - 鄭發
《反芻思考》一書教導如何將糾結的負面情緒轉化為正向思考，發現全新的可能性，改善人際關係。 互聯網圖片 適中字型 較大字型
最近看了一本由李介文臨床心理師寫的《反芻思考》。一位好友提過，他每逢考慮不周，就會「反芻」三幾日：自責為何沒有做得更好、為何沒想到事情會這樣發生、為何沒有諒解對方難處……。
我剛剛相反，每逢考慮不周，畀人質問我點解「諗唔到」，我都答「諗唔到」係一個現象，無得解。
讀此書有意外收穫。作者話當一個人生活受阻，大腦就會去搵原因，但情緒會主導，推論會過於簡單，會將責任「全部」推給自己或別人。這觀點解釋了一些「職場怪現象」：
1）責任全部推給自己：好多junior staff 被反芻思考操控，凡事就把責任全部推給自己（呢次實入我數），還會把事情災難化（老細實寫死我）和標籤化（班友背後實唱我廢柴）。由於感覺太恐怖，他們很怕犯錯，以致無法面對和管理好反芻思考，令事情變得self-fulfilling，最後上級真的會覺得他們無信心、無sense、無鬼用。
2）責任全部推給別人：好多senior staff 被反芻思考扭曲。佢哋乜都 seek your inputs（＝問過你啦）， FYI（＝你知㗎），other views welcome（＝你無反對喎）。另一招就係提出好多問題，等你笨人出口話無問題，第日出事時就賴你。第三招係無限擴大定義。這些人被扭曲到真心認為：錯係人哋、功係自己。他們無誘因管理好反芻思考，如果佢老細唔修佢，你就無佢修！
3）責任全部推給件事：更高級嘅人，個個都under佢，所以賴唔到其他部門，但可以賴地硬。他們會問：點解傳媒硬係要報道負面嘢？點解咁重要嘅point無人講過（其實係講過）？點解件事會咁發生？這類人太強了，他們沒有管理好反芻思考，而是消滅了它！他們高高在上，穿上皇帝新衣都唔會有人出聲。對於這類難答嘅問題，我會收口，等高手明撐暗擦，讓老細自Hi一番。如果自Hi過後認真處理問題，那傷害不大。但如果老細Hi爆唔收手，搞到下屬要諗計justify佢嘅言論，咁就好易變成uglierbaby！
我希望我能夠繼續認錯，因為如果有一天我唔需要再認錯，我應該係香咗！
我希望社會大眾可以容錯，尤其是無心之失和唔夠醒，因為犯錯真係人之常情，只要你肯原諒，做事嘅人就可以更專心處理問題，唔使為了解釋自己無錯而一直錯下去！
足本版請見「貼地風管」facebook 專頁
鄭發
本欄逢周一刊出
貼地風管 - 鄭發 舊文
來源 source: http://hk.finance.appledaily.com