【大茶飯】4K+5G的新時代（青冰）
正當大家還在擔心誠哥告誡之時，股市上周又繼續有活力，雖然個指數全周只微升400點，但弱勢板塊企穩，概念股亦開始有火氣，發改委先漏口風話要救經濟，主力基建、汽車、家電及5G，上述板塊在早前已有買盤偷步吸納，至星期四工信部提出汰舊換優，以5G傳輸配上4K
電視，這亦配合發改委促進消費的重點，就是提高消費質量。
央視亦同時公佈，今年在深圳舉行的春晚，將首次用上5G傳輸加4K超高清影音，4K+5G忽然成為了熱炒概念，所以星期五突然狂炒創維(0751)及TCL(1070)，不無原因。
青冰近年極少睇電視，同電視脫曬節，莫講話4K呀，所以即時上網翻查國內最熱賣的4K電視品牌，係創維、TCL、小米(1810)、海信、康佳及長虹，前三者在港上市，後三者在內地上市。按最新財報之數字，賣電視收入最多的分別是創維、TCL及海信，而外資最強就是Sony、三星、Sharp及飛利浦，老外嘢當然質素有保證，但售價亦相對貴，目標市場係有錢人吧，重點是如果阿爺要刺激消費扶經濟，青冰唔太相信日後有補貼時，外資會有同等優惠囉。
創維及TCL近年的業績，都顯示了在艱苦經營，兩者的股價都在2015年見頂，之後跌足三年半，一月頭先見底，累跌6至8成，真得人驚，但股價是向前炒嘅，如要睇返轉頭，就集中睇4K電視對他們的重要性吧。
創維的電視業務收入，主要來自內地市場，佔三分之二，但如果用銷量計，內地只係略多於五成，但外國係賺錢內地反而蝕，而內地銷量中，超過一半是4K電視。TCL的內地電視收入及銷量，跟海外是四六之比，而4K電視暫時佔總體銷量，只是29%，不過兩個市場都賺錢，算健康啲。
照咁睇，如果有4K電視扶助政策，相信創維會最受惠，因為銷售過半是4K，加上內地市場仲蝕緊錢，急需扶助呀，再睇返上星期五的股價表現，創維升16%，TCL升9%，所以幾時都話，萬種行情歸於市，市場反應總是先行一步。
4K+5G能否成為今年的領頭概念，仍待觀察及政策落實，不過總算為市場注入生氣，且看這個浪頂唔頂得到春晚啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com