金融High Tea - 陸羽仁 2019年1月17日
鋼鐵係另類地板股
2019年01月17日
一月份全球股市持續反彈，美股隔晚高收，升至一個月以來高位。英國國會否決首相文翠珊嘅脫歐協議草案，首相再面臨被逼宮威脅後，美股升幅稍為收窄，之後又再回升。杜指收報24065點，升155點。港股走勢相若，同樣先跌後回升。
輪到藥股食胡
英國脫歐喺下議院投票受挫，多少有點預期之內。往後無論文翠珊去向如何，再度公投機會都會增加。若然公投，有相當機會留歐，成為硬脫歐以外另一選擇，所以消息雖然偏淡，對金融市場暫時未見到好大衝擊。美股焦點仍然落喺業績公佈，如今已公佈業績嘅公司中，摩根大通同富國銀行業績令投資者失望，反映傳統生意競爭大。串流影視平台Netflix調高美國客戶月費，就成為利好消息。市場同時憧憬，中國會推出更多刺激經濟措施。
港股同樣炒國策，噚日輪到醫藥股食胡。恒指早段微跌，收報26902點，升71點；國企指數收報10555點，漲52點，成交金額875億元。
大行近日接連唱好唔同嘅政策股，花旗話，內地製藥股被市場嚴重低估，2019年或見資金流入醫藥股，將中生製藥(1177) 、雲南白藥和麗珠集團列為首選股。醫藥股跑出，中生製藥收升7%，報5.85元；石藥(1093) 收升5.4%，報12.56元，兩隻藥股成為表現最醒藍籌頭兩位。麗珠醫藥(1513) 收升5.6%，報23.75元；綠葉製藥(2186) 授出膽固醇藥物推廣權，股價收升6%，報5.54元。
二線地產股普遍上升
內地上月70個城市樓價按年升9.7%，連續39個月錄得上升，二線內房股普遍上漲，豐盛控股(607) 急彈11%，收報1.46元；富力地產(2777) 獲券商看好，股價收升6%，報14.28元；新城發展(1030) 收漲5.8%，報6.05元。
科技股繼續跑輸大市，小米(1810) 畀機構投資者以每股9.45元，出售2.31億股，股價收挫2.6%，報9.7元。丘鈦(1478) 發盈警，預計去年全年除稅前溢利將急降95%，股價收挫6.43%，報4.22元。
O依家連美股都話關注內地點樣救市，中央又提出五個方向提振經濟。有中環茶友問，咁有冇咩股份可以炒落後？陸羽仁反問，鋼鐵股係咪可以考慮呢？有此一說，皆因一個字，就係「平」。
以馬鞍山鋼鐵(323) 為例，現價市盈率約為5.5倍，息率有5.6厘。今年公司業績偏穩，頭三季每股盈利0.75元，若用全年每股盈利1元計，市盈率低至3.5倍。
鋼鐵股低迷有兩大原因，最直接係涉及中美貿易角力，國產鋼鐵出口美國要徵稅。另外，鋼鐵仲係舊經濟股中嘅最舊經濟股，但勝在估值好低，好似馬鋼係行業龍頭尚且如此，何況其他？
有茶友話，怕唔怕內地鋼鐵供應過剩，加上有中美貿易戰陰霾？呢啲負面因素無疑係存在，同一時間中央要加大力度做基建，加上其他硬件投資，對鋼鐵需求始終係會增加，股市係炒預期，呢個板塊喺市況反彈下，仲喺地板碌碌下未彈得好高。若然想博中美貿易戰大降溫，又唔怕燒冷灶有排等，不妨考慮吓落啲注！
陸羽仁
金融High Tea 舊文
來源 source: http://hdfin.stheadline.com