智取大市 - 晉佳 2019年3月25日
智取大市：最後業績周吼乜 - 晉佳
網龍明日公佈業績，如果績前有震倉嘅話，或有低吸機會。 互聯網圖片 適中字型 較大字型
李寧（2331）、特步（1368）以至內房股都已大幅炒上，有潛在爆升能力嘅candidates自然買少見少。如果睇嚟緊一個星期公佈業績嘅股份，可以望下網龍（777）。
記得舊年8月網龍出中期業績之際，扭虧為盈，股價單日大升至18蚊樓上，之後隨即向下派發再破底，跌低過12蚊。1月起股市反彈，股價重返舊年中期業績後高位水平，重新反映上次業績表現。舊年上半年，網龍成功扭轉盈賺1.78億人幣，收入同盈利都升三成以上。遊戲業務經營溢利升57%。電子教育經營虧損減少到1.59億人幣，呢個分部花好多年經營，但收入總算錄近五成增長，可預期下半年收入進一步增加，分部虧損減少，令整體純利上升。
網龍之前發盈喜，料全年虧轉盈係意料之內，但佢理由係「下半年業務表現強勁」。只計魔域，高層年初講到，剩係PC版、手遊版單月流水加埋2億人仔樓上，仲未計同騰訊合作嘅魔域遊戲同延伸遊戲。以舊年上半年網龍遊戲收入10.39億人仔計，只計魔域貢獻，相信已有增長，符合「下半年業務表現強勁」嘅講法。美股上周五下挫，港股勢低開，網龍績前有震倉嘅話，或有低吸機會。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com