冰說聰明 - 青冰 2019年4月4日
冰說聰明：比特幣挾爆之謎 - 青冰
比特幣忽然在星期二的亞洲時段急升，有傳是匿名買家大手入貨，亦有說是挾孖展斬倉。資料圖片 適中字型 較大字型
沉寂咗好耐的比特幣，忽然在星期二的亞洲時段急升，在港股午休時由約4,200美元，一小時內升穿5,000美元，一度升兩成，內地A股的區域鏈概念亦乘勢而起。在港股，較相關的應是栢能（1263）及桐成（1611），前者係賣顯示卡，早前瘋狂挖礦時最受惠，後者就係去年賣殼予火幣網。
比特幣爆升的原因，眾說紛紜，有指係區域鏈會被主流採用，亦有指這是升市藍燈籠，炒到無嘢好炒先嚟升。彭博新聞在整個下午都找不到原因，至晚上才勉強搵到有分析指，有匿名買家短時間內在三個交易所發出極大量買入指示，因加密幣一向流通性低，一挾就自然爆升啦。青冰有位業內人士朋友就奔走相告，話只是追孖展斬倉箒，好快會回復平靜雲雲。
兩大芝加哥交易所CME及CBOE都有比特幣炒，不過CBOE在上月就宣佈，不再推出新的比特幣期貨，換言之，6月到期的就是最後一個月份。少咗個對手，CME自然有得益，但少了一個場，將原本已唔太流通的幣搞到更乾，諗諗嚇，朋友話挾孖展斬倉，都講得通喎。
大家還記得半年前，有位對沖基金經理輸爆廠在YouTube拍片道歉嗎？當日就係敗在看空天然氣。翻查當時天然氣期貨價格，在11月時仲係3.2美元，兩星期內衝上4.9，爆升五成，但就在創4年高位後的幾日，這位基金經理就拍片了。當時睇好多評論，都係笑佢逆市而行，天然氣有基本因素支持，因為乜乜乜所以持續創新高。半年後的今天，天然氣期貨現價是2.68，比忽然爆升前仲要低15%，究竟係基本因素消失了，還是大戶擺明係挾爆這位仁兄呢，自己諗。
至於比特幣爆升是否天然氣事件2.0，暫時未知，或者要過一兩星期，睇嚇有冇基金爆煲，或者睇實有冇人開fb live道歉吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com