操盤手札記 - 割柑人 2019年6月4日
【操盤手劄記】從鬼谷子看貿戰 - 割柑人
中美貿易戰已超越貿易層次，近日美國正副總統就出訪五眼聯盟成員國，勸說封殺華為。 資料圖片 適中字型 較大字型
特朗普四圍打貿易戰，中國之外，再闢墨西哥、印度戰線。美國國債孳息曲線倒掛惡化，預示衰退風險增加，資金湧向長債避險。10年期債息一旦跌穿2厘，美股以至全球風險資產，勢現恐慌性拋售。面對衰退風險，聯儲局首次暗示有機會減息。
中美貿易戰已超越貿易層次，升至意識形態嘅新冷戰層次。喺冷戰之下，中美各自拉攏盟國。此情此景，令人諗起戰國時代，鬼谷子兩大弟子蘇秦、張儀，各以合縱、連橫之計遊說列國。近日美國正副總統就出訪五眼聯盟成員國，勸說封殺華為。
各國有無站隊呢？國際政治講嘅係利益唔係道義，正如鬼谷子所謂：「非獨忠信仁義也，中正而已矣。」以歐盟、東盟為例，未見站隊。中美長期角力，歐盟就可拖遲關稅戰，東盟更可漁人得利，越南、柬埔寨等國正不斷接收撤出中國嘅生產線同訂單。
市場盛傳，中國準備打稀土牌反制美國，呢兩個星期，稀土股已炒咗兩轉。不過，炒稀土股，一要注意有無稀土礦場，二要注意有無業績支持。港股之中，打住稀土牌頭嘅，大多既無礦場，甚至長年虧蝕。真正嘅稀土股，集中喺A股，唔好炒錯。
中國有稀土牌、美債牌，姑勿論係咪可行。咁美國又有咩牌呢？David Webb話，有資本制裁牌！美國基金有數以千億美元計嘅資本投資喺中國股票同債券，特朗普可利用外國資產管制處（OFAC）嘅權力，命令基金撤資。舊年4月，美國用過呢招制裁俄鋁（486）。
習近平早前去江西考察稀土企業，引嚟稀土股炒作；佢近日又對垃圾分類作出重要指示，強調實行垃圾分類，為綠色發展、可持續發展作貢獻。周一，環保股應聲炒起，粵海投資（270）飆4.7%，報16.14元破頂，突破頭肩底頸線，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com