金手指 - 孫柏文 2019年6月4日
【金手指 】大把大陸銀行要爆 - 孫柏文
包商銀行5月24日被接管，人行話包商係「一個個案」。 互聯網圖片 適中字型 較大字型
近呢幾年，孫柏文喺街遇到啲fan屎時，好多時都會被問到「大陸啲銀行好唔好買？」而我最鍾意就係反問，點解佢對呢啲銀行咁有興趣。答案永遠都係「好抵、高息」。我每次都會好禪咁話：「施主，06年啲美國做按揭嘅金融股，都係好抵同高息呀。」
上月底，大陸嘅包商銀行被接管。人民銀行開記招解釋，五千萬人民幣以下嘅債權人，政府全包底；五千萬人民幣以上嘅就話會攞番超過八成喎。講真，呢啲新聞最驚就係爆擠提潮，銀行系統總存款下降。
不過，人行記招有個位應令唔少香港人震一震，就係完全冇交代啲股東點。唔講，即係冇得賠。好啦，噚日就話已停牌三個月嘅錦州銀行（416），佢嘅會計師EY辭職。揸住錦州嘅股東們，你哋啲錢都係凍過水了。咁喺眾多出唔到2018年年報嘅大陸銀行中（我喺gab分享咗個成個表），論負債排名，包商排四，錦州排第二。
最後，本報報道，人行話包商係「一個個案」（乜嘢chinese is this？），又話「依法支持，實施收購承接，是一種比較穩妥的方式」（OMG）。老實，因仲有大把大陸銀行要爆，係時候編輯準備定大陸話翻譯做中文嘅詞彙。好似當年subprime叫「次按」咁。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com