大棋局 - Mr. Tregunter 2019年6月4日
【大棋局 】中國反制模式成型 - Mr. Tregunter
中美貿易戰雙方表面上保持強硬姿態，但實際上已準備緊和議工作。相信特習會面後，會有好消息。 資料圖片 適中字型 較大字型
6月2日，中國國務院新聞辦公室發表《關於中美經貿磋商的中方立場》白皮書，措辭溫和，綿裏藏針。白皮書主要將個波踢番畀美國，指摘美國罔顧現時世界要分工合作的現實，貿易談判有波折，並非中國最後要求修改協議，而係美國三次出爾反爾。簡單嚟講，就係話全部責任都在美國。
之所以話白皮書綿裏藏針，因現時中國的應對方法已成型，就係美國做幾多，中國就做幾多。中國反制手段唔會超過美國，因中國一開始所宣稱的立場，係唔想打，但要打就嚟。如此外交姿態其實就係封咗底，即往後美國要出招便要考慮中國有同等程度反制，而美國不出招，中國便不會加碼。
美國副總統彭斯的演說如一篇檄文，檄文作用係令自己出師有名；中國由於要確立自己係被動應戰立場，所以不能用檄文形式，白皮書其實想發爛渣狂鬧，但亦只能用溫和措辭表述。於是我們可以看到，美國加中國關稅，中國便加美國關稅；彭斯有檄文，國務院就有白皮書；美國搞華為，中國就搞聯邦快遞；美國出中國企業制裁名單，中國就出不可靠實體清單。
特習會面後料有好消息
美國作為全球各大規則秩序的大莊家，係食硬中國，亦由於認為食硬，所以貿易戰開打以來技巧都比較粗。就係你唔聽，打到你聽。中國處於弱勢，所有反制措施去到最後，必然同美國無法對稱抗衡。正因為弱勢，縱然被㩒住打，應對方法相對細緻。即是之故，估計中美貿易戰形勢發展，非常大機會如豐臣秀吉同德川家康之間的小牧．長久手之戰。弱勢一方最終戰略目的，係要對家啃自己唔落，要退又不能退，然後再還價先有靚價。
中國在貿易戰最終只要和談係確定的，差在以乜嘢價和談。由於牽涉往後幾十年中國經濟發展路向，必然要爭持到最後一刻。美國最初之態勢拋窒中國，不確定美國最終目的若何。當中國在貿易協議最後一刻偷到雞摸到特朗普底牌，其實亦只係要你簽，中國馬上判斷可以開始稍作強硬反制。
現時係臨完場前最後講條件的階段，雙方仍會表面上保持強硬姿態，但吾人認為實際上已準備緊和議工作。貿易戰表面越演越烈，係要最後鋤價，不止中國鋤美國價，美國亦要鋤到中國出多口價。長戟十萬隊，幽冀百石弩。發機若雷電，一發連四五。浩大，往往只有觀賞作用。個人估計，特習會面後會有好消息。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com