智取大市 - 晉佳 2019年7月15日
【智取大市】樓市跌浪之缺口（下） - 晉佳
新盤租金回報率低，會令新資金投資需求越來越少，長遠係咪一如以往具備承接力，將成疑問。資料圖片 適中字型 較大字型
上期講到，優質高息股強勢，領展（823）、港鐵（066）早已進入2字頭股息率時代，優質資產價格係08金融海嘯後最貴，仲要睇短期趨勢，價格繼續升、回報增長追不上成為常態。
經濟放緩之下，配合資產回報同融資成本之間嘅息差收窄。減息嘅效果，其一係讓資產價格周期延長到美國大選，以港樓為例，升浪已經16年，就算能夠捱多兩年計，都稱得上是尾聲。
2厘息係乜概念？美國目前聯邦基金利率相若水平、略低於港元一個月拆息水平、張高麗親家信義系嘅融資成本水平（賬面計）。2厘鬆啲，大概係市場上面能借嘅最低融資成本。如果有條大水喉，可以借2厘幾息無限金錢去買嘢，過往日子確係大把嘢買，但去到領展2厘幾息，呢啲平錢買領展頭一年幾乎冇息收，變咗係買佢派息會增長，雖然樂觀啲睇，長遠仍有利可圖，但風險回報對借平錢嘅投資者嚟講似乎好一般。
最慘嘅係，以港股為例，慘到領展2厘幾息，啲錢仲要衝入去，證明錢好多，但投資者買得落手嘅嘢資產真係好少。
講返港樓，最近新盤租金回報3厘已經講到鬼咁吸引，回報率低會令新資金投資需求越來越少，加上《逃犯條例》修訂嘅風波削弱投資信心同長遠基本因素，當港樓跟隨環球資產市場下滑之時，係咪一如以往具備承接力，將成疑問。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com