【大茶飯】百威觸礁 水緊非主因（青冰）
執筆之時，百威亞太正式發通告取消上市，各方友好一定各抒己見，當中唔少係話市場冇水，拆息抽高資金緊嘛，而青冰聽到另一個較可取的，就是內地資金根本對佢興趣不大，佢哋會諗：國際知名品牌又如何，有買貴冇買錯，呃老散就得，在全球最大的國內啤酒市場，百威只是第
三，前面係華潤啤酒(0291)及青島啤(0168)，你仲要用個高過人哋的PE上市添，講唔通吧。
青冰今次都有用實彈支持，息貴固然是主因，但最重要係，三千幾億市值的超級巨無霸，唔通你預佢會裂口爆升三、四成咩，上面所講的估值，其實係虛無縹緲，兩年前拎嚟上，招股價高多兩成都會有人照搶。而另一致命傷，係點解咁大隻股票上市，竟無基石投資者，青冰睇返報導，首席財務官在招股簡介會，都話唔知公司為何有此決定，有說管理層認為自己是國際知名品牌，已經夠曬啦，有麝自然香，結果香咗。
國內及本港水緊，其實都不是今天的事，但市況並不是太差，恆指今年升一成，但升兩成的主板股份有四百隻，市值超過百億的股份也有140隻，係嘅，去年乜叉都跌，今年升返都唔係太巴閉。水比以前緊，大家都知，但未致於係緊到令個市仆直，就以過去兩星期來看，拆息係高咗，因為半年結及百威招股，劵商紛紛留錢等孖展，但如果你細心睇，一星期及兩星期的拆息，在招股開始時是係約三厘半，但之後是連跌六日，最新係報1.58%及1.74%，這個水平比半年前當然係高，但同4月比就係差不多喇，至於本港政局不穩令拆息抽高，就是另一個課題，視乎你想唔想客觀分析而已。
回應返上文講過，內地資金對百威興趣不大，青冰無法求證啦，但如果阿里巴巴真係如傳聞所講，9月底上市，其實內地資金保留彈藥，屬理所當然，須知道，巴巴上市不是一隻股票咁簡單，有大半都是政治任務，面子工程，長遠計棄美回港也可避險，換言之係一定唔衰得的，所以實在唔需要在乎抽水200億還是100億美元，反正巴巴都不缺錢，總之屆時一定要一呼百應，好喇，如果抽咗百威，係咪到時9月一定走得甩先，一陣沽貨時隊冧咗百威，令市場氣氛差，再影響到阿里巴巴，相信內地資金擔當唔起啊，所以抽少隻絕對無壞啦。
講完一大輪，補充返如果百威再來，一定要抽啊，百威阿媽身懷千億美元長債，講水緊佢一定緊過香港，所以再招股一定減價縮集資額，或者仲會有基石投資者添，到時戰友們識做啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com