魚樂無窮 - 唐牛 2019年11月21日
【魚樂無窮】半新股滔搏有勢 - 唐牛
滔搏於上月10日上市，昨升4%，創一個月高位，有機會挑戰上市高位10.5元。 資料圖片 適中字型 較大字型
恒指再次進入悶局mode，全日高低波幅不足200點，玩指數就算金睛火眼都未必有肉食，始終中美雙方一日未就貿易戰簽訂協議，一日都仍有變數，最大鑊係而家連落實嘅時間地點都未有，你一言我一語下，高開或低開完再橫行恐怕成為近日主旋律。
至於美國參議院通過《香港人權與民主法案》，會否左右港股走勢？相關法案要待兩會提交合併方案，再由特朗普簽署先會生效，說穿了就係美方談判籌碼之一，單獨影響最多只係心理上，但全盤考慮因素又多一個。
早兩日做《午市急Call》節目已提到，要搵食一定要揀啱板塊，昨日體育用品股再次落鑊，持倉之一李寧（2331）炒高逾半成，半新股滔搏（6110）亦升4%，創一個月高位，睇圖呢轉有機會挑戰上市高位10.5元，短炒客不妨留意。
另一個焦點是今日放榜的美團點評（3690），你問我一定話睇好，因為本人有持貨。既然咁主觀，倒不如分享一下投資策略︰假若今日股價破頂，反映有資金偷步，值博率便大大降低，寧願等埋成績表再部署；如果橫行的話，則不妨小注入場，只要業績勝預期，破百絕對不是夢，反之派對就會完結，入場前務必計清楚，good luck！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com