美國聯儲局突然在本港時間周一早上減息1厘，兼且重啟量化寬鬆，重返2008年金融海嘯作戰狀態。雖然大力放水，但
股市卻不領情，美股期貨率先跌停，港股在上星期五所謂大奇跡日後再次大跌，埋單瀉近千點，A股亦挫逾3%。
好多人都問，明明星期三就議息，點解儲局都等唔切，要提早做嘢，仲要狠劈一厘咁多？從陰謀論角度出發，儲局預計有更大危機出現，所以才大刀闊斧出手。咁啱有戰友同唐牛講，佢朋友因為槓桿買債，輸掉75%本金，咁多年賺回來嘅一鋪清袋。事實上，在超低息環境下，槓桿買債非常普遍，泡沫亦因此越谷越大，鮑威爾係咪借減息托住債市buy time呢？債券市場補倉潮錢從何來？值得深思。
樂觀啲睇，原本星期三的減息行動，早已在市場預期之內，對恢復市場信心作用係零，如今突然出手，除配合環球央行外，更予人放手一博的感覺，希望帶來驚喜，但最終會否變成驚嚇，就由市場判斷了。
零息政策下，地產股雖然屬受惠股，但經濟轉差下，售樓收益係咪可以keep到？夠唔夠cover商場生意損失？相對來說，派高息的公用股抗跌力相對會較強。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com