【操盤手劄記】假得離譜的數據 - 割柑人
中國上周五公佈就業數據，首季新增就業人數229萬，喺疫情下，百業停擺，有冇作大？ 資料圖片
武漢肺炎橫掃全球，第一波1月喺中國爆發，第二波3月喺歐美爆發，凸顯全球化嘅風險同代價。疫情發酵，各國對於同中國脫鈎嘅輿情亦發酵，而且唔係等疫後先做，
而係現在進行式。反全球化之聲，實為美中之爭，講白啲，係去中國嘅全球化！
4月7日，日本議決撥款協助日企撤離中國；4月9日，美國白宮經濟顧問建議補貼美企撤離中國。另外，過去兩周，德國、英國、澳洲先後採取措施，防範中資趁疫情收購當地企業。更甚嘅係，美、英、德、澳、印等國政客都話疫後要向中國索償。
雖然疫情引發多國審視同中國嘅關係，尤其係供應鏈方面嘅依賴，擔心衞生同經濟風險，但全球產業鏈去中國化，唔係話咁易，相信短期難以同中國脫鈎，只會遷走部份產能，畢竟撤離需要考慮成本、工人、運輸、供應鏈配套等問題。
對於中國，挽救經濟比外資撤資火急。上周五，中國公佈首季GDP按年收縮6.8%，按季收縮9.8%，係1992年有季度紀錄以嚟首次負增長。政治局夜晚公告，將以更大政策力度對沖疫情影響，「六穩」之外提出「六保」，都係首務保就業。
同日公佈嘅就業數據，可堪斟酌。首季新增就業人數229萬，喺疫情下，百業停擺，有冇作大？國務院研究室主任黃守宏舊年講過︰中國GDP每增一個百分點，可增190萬到200萬人就業。以此推算，GDP負增長6.8%，何來新增就業229萬人？
周一，滬股升0.5%，港股跌0.2%。政治局強調財策、幣策加碼，首務擴大居民消費、有效投資，市場預期內需、基建勢必受惠，當中，5G股備受追捧。5G股中，可留意京信通信（2342），該股有力上試上月高位3.83元，可候3.5元吸納。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com