【大棋局】是衰退，不是復蘇 - Mr. Tregunter
WTI油價昨日暴跌到10幾蚊美金，對上一次要數到97金融風暴後，WTI最低跌到11蚊。 資料圖片
輪到俄羅斯暫停穀物出口。俄羅斯境內武漢肺炎疫情持續爆發，上周五宣佈暫停多種穀物出口6個星期。疫情爆發後，俄羅
斯同鄰近國家4月初已經開始用配額限制穀物出口，包括小麥、大麥、黑麥同粟米，4至6月配額700萬噸。700萬噸約莫就係舊年同期水平，所以最初配額制，只為防搶購出口太多，唔算收緊。俄羅斯農業部上周五宣佈此配額用完後就會暫停穀物出口，預計配額5月中或之前將會用盡，所以停出口6個星期即係到6月尾。要知道，俄羅斯係全球第一小麥出口國。
另一邊廂，執筆時WTI油價跌到14蚊（美元，下同），已經20年冇試過。跌到10幾蚊，對上一次要數到97金融風暴後，WTI最低跌到11蚊。油價跌到咁平自然好多人想撈底，同時由於期油現時仍係contango，會有炒家做Cash-and-Carry Arbitrage買現貨沽期貨賭。所以此時有個現象，海上漂浮住1.6億桶原油。VLCC超大油輪，一艘可以載200萬桶油，最新統計海上有60艘，比兩星期前多一倍，而且仍在持續增加。
劇變前夕 改革難免
國際能源總署早前指疫情令全球原油消耗每日少2,000萬桶，高盛則估每日消耗少2,600萬桶，但OPEC+減產協議只係減970萬桶。陸上儲油設施已爆棚，上一次油輪載滿石油周圍泊景象，係中共在油價140蚊時搞戰略儲備，然後油價插到09年的40蚊之際，當時海上儲油亦只係1億桶。因此就算慢慢開始復工，原油積壓的庫存都會令油價一段時間內難上。
作為世界工廠的中國，官方雖然宣佈疫情趨緩，復工率大升，但研究公司SpaceKnow以衞星收集中國超過5,000個供應鏈聚點的紅外線數據，其活動指數顯示中國供應鏈持續大幅萎縮。此外，以衞星收集中國上空的甲烷同臭氧值，以空氣汙染評估開工率，發現經濟活動仍然低迷。
1929年大蕭條第一個出現的特殊現象，係需求突然一夜消失。牛奶多到要倒入河，糧食多到用來當柴燒。伴隨而來係全國性大規模失業，大量平民冇得食要去糧食銀行排隊。第二個特殊現象，係日本兩任財相井上準之助及高橋是清，分別先後用通縮及通脹兩個方法試驗解決經濟蕭條。前者失敗，後者表面短暫成功，但下場都係被刺殺。經濟衰退，人心就會躁動，改革思潮湧現。無論是否願意改革，都將要面對歷史的推進。一種改革係修改舊制度，另一種扮改革係演變成民粹。毫無疑問，這是劇變前夕。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://s.nextmedia.com