【金手指】俄鋁制裁兩周年 - 孫柏文
全球鋁業將會係冰河時期，俄鋁喺呢個位冇吸引力。 資料圖片
孫柏文他朝回望人生成個投資歷程，最能令我回味嘅一隻股票，一定係俄鋁（486）。
2018年嘅4月初，美帝商務部突然宣佈話一個月後會全面制裁俄鋁，嚇到隻嘢由之前收市4.6元，一嘢躂到落翌日2.3
元收市。我亦喺嗰日開始入，當我估冇得再跌時，就喺兩年前嘅今周，啲銀行開始逼客戶沽貨，股價進一步下跌至見1.31元。之後美帝商務部一拖再拖落實日，俄鋁股價亦浮沉喺2元。
我就喺之後半年不斷溝貨，差不多成個投資組合都係俄鋁，平均價大約2.4元。2019年1月，美帝宣佈擱置所有制裁計劃，隻嘢就飆到3.98元。今年初，俄鋁上到差不多5元。我諗住：「卒之近啲我嘅目標價喇。」
點知1月，視面子、威望為浮雲、糞土嘅偉大中央，突然宣佈武漢封城。我決定清倉，平均價4.3元，亦喺本欄寫咗題為「立刻沽清股票」嘅文。
造鋁全球最大產量嘅宏橋（1378），只係舊年發嘅2023年到期美元債，價跌到賣緊廿厘息。你話市場想同你講啲乜？除非有大量產能被淘汰，俄鋁都會冇運行。全球鋁業將會係冰河時期，隻嘢喺呢個位冇吸引力。當然，如果派息，就可再一次考慮，不過已被美帝agent話事嘅佢，邊會益股東？有冇武肺都咁話，我已心死。睇嚇當世界回復平靜，鋁價反彈後，佢哋仲用咩理由唔派息。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com