【創業起義】點解唔去建設社會？ - 尹思哲
美國科技業「重軟輕硬」，最叱吒風雲科技企業，全部靠軟件起家，真正以硬件做到極致，只得一家Apple。 資料圖片
一場大瘟疫，令全世界知瀨嘢。連矽谷殿堂VC，大名鼎鼎Marc Andreessen，亦撰文《It"s Time To Build
》懺悔，呼籲社會重拾美國夢。
Andreessen反問，何解以美國資源同人才，疫災時竟不夠呼吸機、口罩及保護衣？科學家此刻就算研發出疫苖，亦根本冇足夠產能供應。他認為，以上皆不是高科技，美國無準備好，實不為也非不能也。
過去2、30年，喺矽谷為首VC帶風向之下，科技業「重軟輕硬」，最叱吒風雲科技企業，包括Microsoft、Google、facebook、Amazon全部靠軟件起家，真正以硬件做到極致，只得一家Apple。要知道，Apple創辦於1976年，自此可以「睇得嚇」硬件企業，基本上得Tesla同埋SpaceX，即係靠一個Elon Musk傳承。
咁點解成個科技業走彎曬？因為對VC嚟講，投資軟件，之後開發嘅邊緣成本係零，只要押中一間Microsoft或Google級數，跑出咗賺到喊，其中最誇張例如Sequoia投WhatsApp，回報係50倍。相反硬件或生物科技，不是回報低就是投資期長。
當危機殺到埋身，全美都要為昔日「點解唔建設社會」、凡生產依賴中國去埋單找數，聽落似唔似黃子華「拾下拾下」棟篤笑最經典嗰段？香港人都一樣，以前開口埋口，搵食箒、犯法啊、我想㗎，完全無未雨綢繆。終於後遺症殺到埋身，𠵱家至發憤起得切嗎？
香港唔似得美國，唔係話你覺醒咗，想亡羊補牢做番，講聲reboot the dream就有得重新上路。未來半年好關鍵同凶險，大家小心睇路。
尹思哲
http://linkedin.com/in/wanszezit
本欄逢周三刊出
創業起義 - 尹思哲 舊文
來源 source: http://s.nextmedia.com