【創業起義】當肥佬黎同誠哥言和 - 尹思哲
李嘉誠同Bill Gates嘅共通點，除咗首富之外，就係曾幾何時，每日都俾全世界問候全家。資料圖片
創科局推出D-Biz遙距營商計劃，由政府全數資助，5月中開始接受申請，每間公司上限30萬，好似真係有料到，大部份Startup朋友都好似有申
請。以前所謂「數碼轉型」只係口號，畀一啲規模最大嘅科技公司，開宗明義咁去搵上市公司嘅錢。但𠵱家，D-Biz呢個關鍵字，就連Google Ads都大把人爭住去搶，只係區區30萬，你會問發生咗咩事。
當你發現，唔止係接job搵真銀嗰批，就連一間公司上一輪融資以千萬美元計嘅朋友，亦都同我講，諗住趁機會做啲嘢，再加上好多已經所謂「獨角獸」級數初創，都要裁員或者凍薪，你就會明白，成個營商環境真係好困難，每個創辦人都好頭痕。大家都爭同一口飯食，D-Biz係紅海無錯，但你唔可以否認，創科局使呢5億，又某程度上，令成個業界生猛咗，相比起其他大白象工程，作為納稅人，我真心覺得呢5億，又係抵畀嘅。
創辦人梗係為錢煩惱，邊個唔想做Bill Gates或者誠哥？好好咁去貢獻社會？問題係，但凡未到佢哋嗰個級數，都係要獲利優先囉。
有時我會諗，生果𠵱家成日讚李嘉誠，但想當年，自己喺生果打工時，逢李嘉誠必插基本上係集體共識。問題係，究竟需要一個點樣嘅亂世，去到一個地步，就連誠哥都可以同黎智英握手言和？
諗深一層，李嘉誠同Bill Gates嘅共通點，除咗首富之外係咩？就係佢哋兩個人，後生嗰陣曾幾何時，每日都俾全世界問候全家。
尹思哲
http://linkedin.com/in/wanszezit
本欄逢周三刊出
創業起義 - 尹思哲 舊文
來源 source: http://s.nextmedia.com