【收市閒情】海洋公園 救唔救？ - 千頌C
盛智文2003年臨危受命加入海洋公園，一年後轉虧為盈，曾獲全球最佳主題公園殊榮。證明海洋公園係有條件搞好佢，只係現時嘅管理層唔得。資料圖片
今日同大家介紹一種文法，叫「柯南文法」。大家睇柯南時，你都會發現，當佢要指出真正係邊個時，佢會講一句
「兇手只有一個」然後佢會停一停，等你估估嚇，之後先答「就係你！」。
最近，有一位高官，可能睇過嚇柯南，都用上呢種文法「如果唔採取任何措施，答案只係得一個，就係關門。」商經局局長邱騰華，利用呢種修辭手法，去同所有香港人講，如果唔注資海洋公園，佢就會執笠啦。
海洋公園開張43年，搞到今時今日就快要執笠，答案只係得一個，就係梁振英。想當年2003年，盛智文臨危受命，加入後一年，海洋公園轉虧為盈，到2007年，人均收入撼贏迪士尼，更曾獲全球最佳主題公園殊榮，咁好嘅成績，一直延續至2014年，亦即係盛智文被斷約嘅一年，之後就變成大家眼前嘅爛攤子。
昔日支持唐英年嘅盛智文，突然被辭職，雖然佢曾經講過，冇得做主席唔係因為支持CY對家唐唐。不過咁多年過去，去到今年年頭，盛智文接受訪問時條氣都係唔順，「如果你有很棒的主席和行政總裁，為何要改變？他們能賺錢，所有事情也運作得很好」。事實證明，海洋公園本身係有條件搞好佢，只係管理層唔得！
然後當日無理「解僱」盛智文嘅梁振英，噚日出Post呼籲政府放棄海洋公園，情況就好似有人打完你，搞到你重傷得返半條命，再過來同你講：「你生存得咁辛苦，不如死咗佢好過」
今日唔想海洋公園執嘅利益集團，相信仍然會有唔少。林建嶽麗新，旗下海洋公園萬豪酒店，於2019年9月獲18間銀行36億四年期抵押貸款。嶽少貴為經民聯監事會主席，唔知到時經民聯立法會議員，好似張華峰、梁美芬……到時會唔會因利益衝突唔投票呢？
說實在，如果唔批注資，我係海洋公園隻熊貓，我應該會咁諗「本來因為玩政治，搞到海洋做唔住，已經好唔Gur。今時今日，警察開OT都10億，元朗起條行人天橋都話要17億，其實54億元，點解唔用嚟救我？」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com