【利字當頭】沒有救海洋公園的理由 - 利世民
其實大多數香港
人都冇幫襯海洋公園，咁點解用香港納稅人嘅錢去救？資料圖片
「有冇人想救海洋公園呀？」「梗係要救；比起廸士尼，我更加鍾意海洋公園喎。」「你一年去幾多次海洋公園？」「咁都有一、兩次嘅。」以上對話，千真萬確。重點係，其實大多數香港人都冇幫襯海洋公園，咁點解用香港納稅人嘅錢去救？
「多人去，就唔使救啦！」Bingo，咁點解冇人去，就值得救？即係我一世人都係去過幾次福臨門，咁假如有日富豪飯堂要搵人打救，冇理由要我科水，係咪？至於咩集體回憶之類嘅論點，我奉勸有關當局都係唔好吹奏太多。
執笠，咪執囉。自由市場就係會有企業會執笠，海洋公園蝕錢，又唔係近來嘅事；蝕咁多年都轉唔到，有可能係管理不善，更大可能係根本冇呢個市場。冇市場，用公帑救得一時，救唔到一世。幾十年前嘅小朋友，去荔園、海洋公園，好興奮。今時今日嘅小朋友，太多選擇喇，海洋公園，真係Out喇。
市場係咁殘酷，但係焗香港人去救海洋公園，直頭係不公不義。派錢畀多數人，尚且都可以話係還富於民；救海洋公園？我第一個問題係，點解班管理層又唔需要問責？
話說回頭，其實主題公園呢個模式，真係輸多贏少。好似香港呢個土地資源咁稀缺嘅地方，點解會有兩間國營嘅主題公園？睇返過去廿幾年大陸嘅主題公園氾濫，不期然令我有個諗法：「會唔會又係啲咩吸引外國人去睇嚇呢個國度有幾咁盛世嘅國家任務？」咁樣諗，就解釋得到點解政府咁緊張，明知係財政黑洞都一定要救。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com