【冰說聰明】獲阿里加持之教育股 - 青冰
阿里巴巴跟辰林教育合作，成立阿里巴巴數字貿易學院。退了休的馬雲經常話想教書，會否技癢而去這間學院執教鞭？資料圖片
上周末做了個統計，恒指自3月低位反彈了約一成，但從低位反彈了逾四成，而市值又大過50億的中大型股份，原來都有約70隻，戰友應該都估
到係甚麼板塊吧，物管及醫療器械當然有唔少，而有個板塊都有好多股入圍，佢哋普遍在2019年及今年首季平平無奇，環球股災當然有跟跌，但自那時開始便急劇反彈，近日仲分別創52周新高，無錯喇，就是教育股。
相信近日都有唔少欄友推介教育股，仲有咩滄海遺珠呢，辰林教育（1593）可算是其一，此股12月上市，都叫做半新股，不過當時的IPO冇現在咁火熱，公開發售部份只係輕微超購，國際配售唔足額㖭，所以上市首日高開1%便倒插，最後低收7%，國際配售冇人玩，幾位基石投資者最後拿了41.7%貨，以總股本計佔9.4%，再睇公佈IPO結果的通告，當日首25名股東已佔94.9%股份。
五個月過去，這個分佈當然有變，否則證監要出股權高度集中的警示啦，但街貨疏仍是事實，由平日的成交量就可以見到，3月環球股災乜股都跌，但辰林教育由3月高位只跌了約一成，最恐怖嗰幾日跌市卻獨善其身，最後在3月尾公佈業績，扣除上市開支等非經常性項目後，純利按年增長兩成，算交足功課。
騰訊（700）及阿里巴巴（9988）百足咁多爪，但教育行業就較少投資，騰訊持有一成的新東方在線（1797），有騰訊加持係特別勁，今年累升81%，青冰記憶中阿里巴巴就沒投資教育股，但就有跟辰林教育合作，成立阿里巴巴數字貿易學院，培養人才，按3月底的通告指，這個是長期戰略合作，具體事宜再另行公佈，至於日後公司要增資時會否入股作支持呢，是後話，但青冰更想知道，退了休的馬雲經常話想教書，會否技癢而去這間學院執教鞭？
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://s.nextmedia.com