【智取大市】疫情轉機＝股市危機 - 晉佳
美國印銀紙推動升市，印多咗嘅銀紙冇能力流進實體經濟，亦流唔到去買樓，令股票進入無敵狀態。
資料圖片
真正令大家感覺到係牛三，都係最近一星期嘅事。
當指數跌得500點左右，同時唔少當炒個股仲有得逆市升，就證明市場情緒仲未轉冷，正正係「不要怕，只是
技術性調整」。調整後延續升勢，就會癲過上一轉。大價股同二、三線股累積升幅多，越炒越細亦係另一項常識。上星期一二三四梯科技手機概念股齊炒，剩下上周被甩尾嘅醫藥、生科股，平醫、 中生製藥、信達生物之類，估計本周發力，都係大中小全線齊炒。
大家知美國印銀紙推動升市，睇返美國M2數據，3月疫情爆發至今，喺四個幾月裏面，美國M2係狂升18.8%！係二戰後未試過嘅印銀紙速度。喺疫情下經濟不升反跌，貨幣供應大增之下，𠵱家嘅6蚊，只值幾個月前嘅5蚊。
同樣歸因疫情，股票喺唔同嘅投資工具當中，競爭力大增！原因係印多咗嘅銀紙冇能力流進實體經濟，亦流唔到去買樓，呢種現象突然令股票進入無敵狀態。至於幾時牛三會玩完，就係預期疫情好轉或者疫苗普遍化之前，原因係疫情令未來M2增長放緩，同時股市重新面對實體經濟同樓市搶資金，到時就唔能夠承接高股價。
美國疫情仍破頂，但海外疫苗9月開始陸續誕生，所以越貼近9月，市況越危險。當然呢一刻仲係搶錢時間，見頂訊號稍後再談。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com