【笑到最後】「香港Tesla」之死 - 高明
香港理工大學嘅港產電動車「MyCar」2009年已正式發售，早過Tesla Model S 三年。 互聯網圖片
Tesla股價再創新高，網上洗版主要有兩種反應：1. 後悔冇買；2. 覺得香港其實早過Tesla研發電動車。
Tesla之所以成
功，除咗解決咗好多技術問題之外，更加重要係，顛覆咗大家對電動車嘅睇法。當年大家都覺得電動車係商用車，Tesla偏偏打入房跑車市場。同一件事，稍為將定位改變，效果完全唔一樣。
提到市場顛覆，美國FDA公佈，授權Philip Morris國際（PM）旗下IQOS作為風險改良煙草產品（MRTP）進行銷售，指有科學證據的支持使用IQOS可減少接觸有害物質的煙草產品，報告話IQOS只有加熱，冇燒煙草，減少有害化學物產生，好過啲人食傳統香煙。
講番Tesla，本來香港都有Tesla嘅問題，劉澤鋒一篇網上評論指，香港理工大學嘅港產電動車「MyCar」2009年已正式發售，Model S要去到2012年先有得賣。而「MyCar」2012年就賣咗品牌同技術畀美國公司GTA。劉嘅文章歸咎政府商界冇支持同太短視。
現實係，如果要錢，香港有上市集資渠道，不過純睇結果，香港對於新經濟嘅支持，只限於其他地方嘅公司嚟上市。例如電動車，香港有大量上市電動車公司，但大學「自主研發」嘅電動車，就放埋一二邊。又例如加熱煙，連進口銷售都未有，更加唔好講本地研發，相反一大堆未有盈利嘅生物科技B股就喺香港上市。
過去一年，我哋發覺香港有一個強大嘅集資機器，幫其他地方公司上市乜都得，但有關香港經濟嘅嘢就管到緊一緊，簡單如吸一啖煙都要管，其實香港只要放鬆少少，畀啲行業一條生路，香港Tesla可能勉強啲，土炮比亞迪（1211）一定做到！
（筆者為證監持牌人，持有Tesla權益）。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com