陸羽仁周記——升得多不等於貴
7月份港股開局都算係波瀾壯闊，指數曾一日大升近千點，更加重要是成交急增，科技大股紛紛湧上，若然幾隻領頭的大股好似阿里巴巴（9988）、美團（3690）都已經加入恒生指數，相信大市可能已經升到28000點以上。上周五大市回調，中環茶友問究竟係因為全球疫情
包括香港出現惡化？抑或係美股位高勢危呢？陸羽仁的答案比較簡單，就係升得多、升得急，所以出現調整。
A股左右港股重於疫情
港股上周氣氛不俗，但到最後兩個交易日已經露出疲態，最後一個交易日因為本地爆出多宗感染個案，指數一度急回639點收造25727，插482點，但全周仍升354點，是連續第二個星期上揚。有茶友覺得美股近日全靠科技股力撐，上周五恒指在午後急跌，催化劑在於美股期貨回落超過200點。不過，由於傳出新冠疫苗測試結果正面，美股3大指數最後一個交易日做好。杜指收報26075點，升369點；標指收報3185點，升32點；納指收報10617點，升69點，再創收市新高，全個星期科技股大升近4%。美國疫情爆個不停，單日染疫指數飆到超過7萬宗，本地社區爆發同樣未停，抗疫措施有可能再度收緊。醫療專家話，之前祿泉樓的控疫做得不夠嚴，加上檢測數量太少，成為本地控疫最大挑戰。
不過，陸羽仁認為現時市場焦點不在華爾街大市表現，也不在本地疫情，而在美國科技股和內地A股。上個星期尾港股調整得比較急，一大原因是A股之前已經八連升，如果內地股市回調，本地就沒有逆流而上的理由，所以當內地股市回調，上證縮指跌穿3400關，單日下挫1.95%後，港股跌幅隨之轉急。如果睇番成個星期滬指累飆7.3%，同時連漲四周，A股調整都係非常正常。
近日科企一枝獨秀，很多投資者都擔心會不會炒過籠，有炒開美股的茶友，就認為美國科技股雖然估值係貴，但仲未至於離地，炒股有時趁住泡沫仲好玩，如果水波不興反而難玩，遇著有得炒而太早離場，見到個市再升就心癢難搔，屆時可能仲憂危，所以最重要就係計準風險來落注。
中美龍頭科企市盈率約30倍
他認為美國科企價錢雖貴但未離地，舉個例就係蘋果。蘋果是過去十年科企霸主，本來從不買科技股的股神巴菲特首次落注科技股就係買蘋果，後來蘋果股價調整，股神仲被人笑係燈神，後來蘋果唞完一輪再度回升，股神變回大賺，笑他的聲音才靜下來。最近，股神公佈的持倉中，蘋果係一注獨大，差不多有成千億美元，令股神成為公司第二大股東。
股神落重注買蘋果，理由係公司不但在手機市場領風騷，產品有死忠果粉支持令毛利特高，同時因為集團在雲端等領域都做得不錯，蘋果現時市盈率約為30倍，雖然不便宜，但亦不算貴。睇多另一隻傳統科企微軟，同時股價飆上高位，微軟同樣把觸鬚伸到其他科技領域，現時市盈率大約是35倍左右。從股神買重蘋果和公司的估值，至少暫時似乎不用太擔心美國科企會大爆破，香港的手機股，短期可能仲仍然有得炒下。
茶友話，美國科企估值不算太離地，內地的科技龍頭阿里巴巴上周雖然急升，但市盈率現在仲係33倍，以公司現時的增長率，估值與傳統的增長股只係差不多。阿里巴巴跑得慢，主要係市值達到5萬億元，變成負磅好重，所以炒起來有點笨，但這亦反證了個市仲未係好癲，如果把同樣係科技產業有廣泛佈局的全球科企龍頭阿馬遜市盈率去到150倍計，中港科企雖然近日累積升幅感覺雖然好多，實際上仍然落後。
回得深可考慮低吸
美國的科技企業有強大的軍事政治為後盾，以全球或至少是英語國家為市場，中國科企在西方圍堵日益明顯下，最穩陣的只有內地市場，但因為內地人口有十幾億，可見將來都應該夠做。所以大市回調得深一點，又可以是低吸機會。
港股首掛熱炒 內地科創板更精采
港股近日刮起新股熱，上星期五多隻新股掛牌，其中兩隻錄得翻倍升幅，不過與內坡科創板新股大升9倍，差別仍然係「蚊髀同牛髀」。
電子煙公司思摩爾國際（6969）上星期掛牌，股價收報31元，較上市價12.4元，上升1.5倍，不計手續費及傭金，一手1000股帳面賺18600元。另一隻眼科醫藥平台公司歐康維視生物（1477）首掛收報37元，較上市價14.66元1.52倍，不計手續費及傭金，一手500股帳面賺11170元，中1手賺過萬，捧場客自然笑逐顏開。
不過，內地科創板近日炒風仲驚人，最新首掛、號稱中國「量子通訊第一股」的國盾量子（688027.SH）在科創板上市，一度較招股價36.18元（人民幣，下同）飆10倍，收市仍勁漲9.2倍，收報370.45元，創了科創板的紀錄，其他A股首掛牌升幅等閒都有4、5倍。
由於內地熱火朝天，所以股民現在最關注係A股招股超額566倍的中芯稍後掛牌究竟升幾多，由於中芯係科創板最大的招股活動，升幅應難比國盾，所以A股掛牌後要留意香港股份會否出現反高潮。另外，比亞迪傳出會拆旗下微電子上該板，令股價逆市造好，短期內登陸內地科創板，勢必成為炒作焦點之一。
陸羽仁
陸羽仁周記 - 陸羽仁 舊文
來源 source: http://hd.stheadline.com