士佳說 - 張士佳 2022年3月21日
【#士佳說 】張士佳：升跌節奏開始變
【#士佳說 】張士佳：升跌節奏開始變
上星期五大市繼續Chok到非常，中午回來又係裂口高開，如果跟番前兩日經驗，不能令人覺得大市再次火上加油，但實在只炒高了兩百點到216 xx，就行人止步，當大部份人覺得又係要升嘅時候，佢就跌翻落212xx，主要都係投資者杯弓蛇影，猜度美領導人與中方對話會放狠話所致，其實今次呢個局都唔難估，如果上個禮拜五有睇士佳說，見到我寫師奶May 爭做雀壇和平大使，就會估到拜登今次會講得較得體，冇嘢嘅，參考返May 會邀功和平大使，都係人性姐，人之常情，結果星期五全日都冇乜點升，到夜晚九點幾就發力，差不多升成千點到22,200。
不過，估還估，我都冇點大注買單頭，主要都係對沖住來買，因為波幅太大，搵唔到止蝕位就好難大手買單頭，我主要做嘅係沽一些大型變相壟斷性嘅科網股及醫療服務股，騰訊爸爸藥明熊果D（當然唔沽美團），並揸些細間嘅競爭較大嘅競嘅互聯網股像Futu 及KC等較細細互聯網股，我用嘅邏輯係前者唔單止受戰爭影響，更大程度係先前已經受監管，相反後者更受累於美方就烏俄戰爭對中概股既處置，既然今次釋出善意，後者應更受惠，彈得較勁。加上前者是衍生，輸晒有限，可盡用衍生這唯一的優點，輸晒就算唔使擺止蝕。對衝操作其實平時比單頭買仲難，起碼要識既公司要多些，只係近日波幅太大冇辦法，所以我就算唔到做對沖，都會專揀一啲近止蝕嘅做，好似#293 ，博戰爭氣氛稍緩油價回落，及放寬復飛香港措施，結果暫唔見油價回落，如果真係復飛香港，就算蝕應該都唔會好甘。
今次彈上來咁倉促，很多朋友唔知黎緊點做，大家又唔使太擔心，反而唔使太趕時間買，因為我估今日急升完，隔幾日又去返上升得慢下跌得快嘅階段，個市彈咗咁多，一定會有食糊盤出現，因為之前係低位買落，衣家就慢慢食，散戶見市又有好消息升番又急急腳追返，但升完必有整固，加上雀壇一姊，只有一個，你估May真係會放過Chloe咩。
先前投資者以炒大跌的科網平台股為走主，我估指數回落後有機會轉炒返二三線股。所以之前有做過既功課就大派用塲，現時殺傷力最大吾系跌幅，而係波幅，經歷過幾千點上落之後，有些股就算跌得深，亦反彈得好快。中長線不死注既股票如果冇走，都應該反彈返左上黎，例如#1866 心連心化肥星期五一大支陽燭升12%，這就係之前揀落嘅，一些週期性通脹大前題底下的行業，也值得低買高沽低楂，例如星期五先爆細價煤股#1733易大宗，有業績利潤支持股價突破，冇貨今日當然吾會追，等位食完，大市回落先諗。而一向有實力的大煤股#1171，#1088，星期五都似揾到支持。
我覺得要搵低風險入市位，等大市出支持，好多散戶就會衝入去，通常都會失諸交臂，再等多個低些的支持就差唔多；咁萬一個市唔回點算，咁你大市升多兩枝靚仔陽燭，我就可能積極些。暫一係做住對衝，沽大型科網，買些金融股博加多些息或內地放水(記得兩者波幅差三倍，注碼要就番），對沖太難掌握唔到嘅，就唯有單頭買金融股或一些近日跌得少，跌勢稍緩就拿拿些爆頂嘅優勢股，篩選一下就會搵到。
士佳說 - 張士佳 舊文
本文作轉載及備份之用 來源 source: http://skycheung.weebly.com