操盤手劄記│兩隻小輪天與地（割柑人）
操盤手劄記│兩隻小輪天與地（割柑人）
天星小輪總經理周卓賢喺新聞稿話，天星2019年6月至今，累計虧損超過7,000萬元。
地獄天堂，瀟灑走一回！上周，港股首兩日分別大跌4.97%、5.72%，之後兩日分別大升9.08%、7.04%，上周五回吐0
.41%，收21412。隨著中美元首視像對話，夜期高水698點或3.26%，港股ADR比例指數高水596點或2.78%，反映中概股表現嘅納斯達克金龍中國指數大升7.5%。照牌面睇，港股今日又會裂口高開。不過，市場仍然充斥不明朗，留一半清醒留一半醉吧！
美股、外匯、加密貨幣免費即時報價，自選投資組合獲取相關新聞提示。
事隔4個月，中美元首再度視像對話，上次係去年11月16日上午，當日港股高開高收1.27%。以現時恒指成分股中，中資股佔七成計算，舉凡中國相關消息，都對恒指起牽引作用。以中國證監會消息為例，去年7月29日、9月20日、今年1月28日，分別傳出副主席方星海就行業監管、審計監管向外資行解畫，之後港股都出現裂口高開，分別高開2.93%、1.62%、2.48%。
天星小輪 新聞稿鳴笛求救
今次元首對話，雖然美國掛牌嘅中槪股應聲衝上，但中槪股尤其科網股，係咪已經脫險則言之尚早。早前中槪股被拋售，緣於除牌風險，摩通提醒，呢一波拋售唔係由經濟回報而嚟，而係由風險管理而嚟，所以過程中考量嘅唔係估值，估值再便宜，都可能繼續跌，唔建議因為估值低就抄底。另外，法巴指出，市場愈嚟愈關注互聯網企業「為國家服務」同對盈利嘅長期影響。
港股上周遊走地獄天堂，兩間渡輪公司──九倉（004）旗下天星小輪、恒地（012）旗下香港小輪（050），亦有地獄天堂之別。上周一，天星小輪總經理周卓賢喺新聞稿話，天星2019年6月至今，累計虧損超過7,000萬元；巨額虧損遠超公司總資產，早已墮入負資產行列，現時全靠舉債應付日常營運開支，每月收入連員工薪金都抵唔上，幾乎山窮水盡；欠下債務，可能2047年都未能還清！
香港小輪 儼如半隻收租股
另一邊廂，上周五晚，香港小輪公布2021年全年業績，純利1.18億元，按年增3.45倍；收入2.44億元，按年增17.25％；末期息每股0.15元，連同0.1元中期息，全年派息0.25元不變。另為慶祝明年成立100周年，將建議派特別息每股1元，派發日期將於明年公布2022年全年業績時披露。成績表咁靚，全因擁有地產發展同地產投資（即物業出租）業務，儼如半隻地產同收租股，形同港鐵（066）！
香港小輪溢利主要嚟自商舖同商場嘅租金收入，以及投資物業7,600萬元嘅重估收益。地產發展同地產投資佔去年整體收入四成，單計地產投資佔比已達37.5%，高過渡輪、船廠同相關業務嘅佔比36.4%。疫情之下，公共交通客量、商舖商場客流租金都備受衝擊，香港小輪仍賺過億，可算識得變通。該公司計劃年中喺尖沙咀開設旗下首間醫美診所同美容中心，佔地萬呎，年內投資4,000萬元，未來幾年再作投入。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com