士佳說 - 張士佳 2022年6月6日
【#士佳說 】張士佳：低揸高平
【#士佳說 】張士佳：低揸高平
上星期期指急升一輪到21400左右，我們低位有買，可擇機而食，假期前冇做好多野，只係按所寫，博了美團京東牛，博市場視線重歸國內防疫解封，復工復產，消費卷的發放，及減徵車輛購置稅的政策，美團#3690正好受惠，收市後公布第一季業績，虧損擴大至57億元人民幣，但按年已收窄7.8%，外賣盈利就勁升41%勝預期。送餐、旅遊毛利率提升，業務增長理想，在此消彼長下，似乎成本在控制下降，或會很快找到盈利平衡點，這是市場所憧憬。ADR 升5%，今日應該有得高開，或會帶動埋指數，我比較考慮美團近期已在高位，向上空間相對較少，牛都只係作短炒，今日回來食。京東#9618同樣受惠，但价在中位，星期四跟策略博小注揸中線，定下目標$280左右。
6月的灣區車展，人流如織，車展效果似乎非常不錯，銷售量報捷，車企除了有政策扶持，本身的業績數據亦交到功課，以電動車龍頭比亞迪002594.SZ 為例，5月新能源汽車銷量11萬輛，按年增長2.5倍，A股已經衝破300元人民幣，看來對H股#1211比亞迪仍然有利再升。汽車股終於再次發力，吉利#0175算是慢升，廣汽#2238亦已悄悄地已升抵250天，一眾車股似乎仍有動力，而我的#305五菱汽車，走勢上亦不遑多讓，只差一步到250天，睇下今日到唔到，如到，會按照策略等陰燭食半，留半來承著汽車政策的氣勢。週末又有最新政策，2.0升及以下，不超過30萬元的乘用車，可以享受最高補貼的政策優惠，五菱汽車非常合符資格；此外，週四加了處於較低位置的＃2333長汽，博落后；汽車做好，更低位的汽車零件商值得追落後，昔日細价股皇＃558力勁，唔知會唔會死灰復燃，頗值得期待。
此外，受惠汽車需求復甦，汽車促銷，營銷量爆數，汽車經銷商的新車銷售將直接受到支持。#3669永達汽在上海擁有3成汽車經銷店，而且已全面恢復運營，積壓庫存需求得到釋放。市場估計新車銷量下半年會升1成之上，圖表近日亦升近1成，回一回再突破9.1，或会升多過1蚊，止蝕用7.6左右，計落算稳陣。
海昌海洋公園#2255，公佈折讓約2成配股，配售可以有3億資金用以開發建設鄭州規劃的大型海洋文化主題公園，還有其他海外投資發展。不失為好消息，高見7.3港元，再創歷史新高。上星期估佢會加速上升，圖表領功，並建議陸續食糊，假期前高開，應該食曬，等回到支持位才考慮，依家又有位可以睇，可以參考佢配售價5.5元有冇支持先。另外，上海海昌海洋公園宣佈將於6月3日至6月10日免費向公衆開放，每日限量5000人；並於2022年面向全國醫護工作者免費開放。
樂享集團#6988創一年來新高，升6%。樂享是國內領先的自媒體營銷服務商，與抖音TikTok有深入合作，推進海內外直播電商業務，盈利可期，藉著科技股平台的監管開放，比起大型龍頭科技經濟平台，市場情願揀冇乜蟹貨，又比大市強的樂享，我早已叫大家參與破頂。
咁又唔係隻隻股買左有大前提下都可以順利有得升。醫藥股及水泥股跌得頗為突然，而且炒基建政策預期的#830中國建築興業，星期四突然之間急插穿位，由低位2蚊附近徘徊，揸住咗咁耐都一直慢升，未知是什麼原因急跌，市場導說有機會是受水泥股急跌影響，唔知頭唔知路，暫都坐下先。
再跟進下#0020商湯，呢隻近期多人問，即市多左人關注，相信市場蟹貨都唔少，始終商湯上市時大前提吸引，又急升2倍有多，非常觸目，但要注意半年禁售期性就到，再炒高一啲有動作唔出奇，不過6.5以上阻力吾細，我未有貨，等陰燭再有靚仔大陽燭突破阻力再算。
市場不乏焦點，高度景氣又較穩的航運股，東方海外國際#316，中遠海能#1138，近日追昇得厲害，應該是受美國想取消關稅的討論催化，又有大需求做前題，1138上週已叫關注，逆市破頂都要追番啲貨，博加速上一段。
個股表現不錯，承著大市反彈，但指數上面蟹貨重重，要真係儲夠力先可以突破，我暫都係睇21650至22000，低摣高平，摸住石頭過河，但係向上爆升嘅破頂股，唔少都係寶藏，好似#3378廈門港，臨停牌前裂口高開，有30分鐘比有心人補貨，跟住大股東提55%溢价提全購，相較估來估去容易，唯一憾事一定係買得唔夠多矣。
士佳說 - 張士佳 舊文
本文作轉載及備份之用 來源 source: http://skycheung.weebly.com