領展上周破天荒宣佈供股，圖為旗下商廈物業。
焫㷫食息族！上周五，港股市場最令人O嘴嘅事，莫過於本港最大房地產投資信託基金（REITs）領展（823）開市前突然停牌，收市後宣佈供股。供股以五供一作基準，供股價44.2元，較停牌前股價62.8元折讓29.6%，較該股價計算嘅理論除權價59
.7元折讓26%，並較每股資產淨值折讓42.7%，集資188億元，由牽頭包銷商滙豐、星展、摩通全額包銷。買領展嘅股民通常係長揸收息，皆因REITs按例最少要將90%賺到嘅錢派息，供股有折讓又點，要供就要畀錢，唔供就被攤薄權益。
美股外幣即時報價 多國新聞任睇
今趟領展供股，唔止係領展上市17年嚟首次供股，亦係本地REITs首次供股（2021年12月越秀房託（405）曾經供股，但屬內地REITs），兼係港股過去13年嚟最大額嘅供股計劃。領展既係REITs龍頭，又係藍籌，破天荒供股，令人諗起2009年3月藍籌滙豐（005）世紀供股，亦焫㷫長揸收息嘅股民，股評人胡孟青更喺電視直播節目感觸流淚。不過，供股未必係壞事，視乎集資嘅用途。據領展通告，供股所得40%至50%用於還債，其餘部分用於探索未來投資機遇。咁供唔供好？
收息回購成果 變食白果
供定唔供，翻下舊帳計下數先：①領展2020年1月起，每手一拆五，由500股拆細成100股；如今五供一，每手100股要供884元。若喺拆細時入市，至今每手合共收息896.89元；換言之，3年收息一鋪清袋。②據戰友股榮統計，過去10年，領展合共動用175億元回購股份，合共回購2.75億股，每股平均價63.63元。今次供股，最少發行4.26億股，計及可轉換債券獲悉數轉換，最多發行4.38億股；換言之，10年回購、註銷股份嘅利好效應一鋪清袋，兼有高價回購、低價供股之嫌。
除咗收息、回購嘅成果變成食白果，為人詬病嘅仲有供股集資半數還債。點解負債咁多？領展近年積極向外收購，版圖由中港拓展至全球，負債比率不斷上升。領展一向以銀行借貸同發債融資收購，上年11月就發行5年期可換股債券籌33億元，但喺加息周期下，融資成本上升，唔少券商都擔心領展利息開支大增，削弱收購能力。對股東嚟講，供股集資造成攤薄效應，但對領展嚟講，唔使舉債向債權人支付利息，喺加息周期下，係成本較低嘅融資選項。
今日復牌 股價恐跌一成
市場點睇？部份分析員對領展供股有保留，一來管理層高價回購、積極收購嘅過失，要由股東埋單；二來供股新增嘅基金單位，佔現有總數20%，佔攤薄後總數16.7%，粗略估計每股派息將會攤薄一成以上。不過，亦有部份分析員睇法正面，一來供股比起配股公平；二來喺加息周期下，全球商業物業價格較低，係收購優質項目嚟收租嘅良機，有助長線發展。
領展今日復牌，供股造成嘅攤薄效應不利股價表現，包括每股盈利、每股派息被攤薄，亦可能令整體價值同之前比較有折讓，估計股價跌一成係最低消費，但不至於跌兩、三成。領展現價62.8元，可留意會否喺55元水平有支持。至於供唔供股，供股價折讓三成，驟眼睇有著數，但要睇埋股價跌幅，2月23日係按連權基準買賣嘅最後日期，到時再睇股價先決定未遲；唔想加注嘅話，亦可沽出供股權。
割柑人
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com