當年學買賣股票，其中一種必然狀態，叫孖展。
上星期講到，美國如果進入減息周期，有一隻股值得賭，話係賭，因為首先要博真係減息，然後再博嗰隻得。
美股外幣即時報價 多國新聞任睇
今個星期再推一層，就係講減息周期投資者必然會面對嘅問題：點樣用孖展。
大概高明呢一代人，差唔多冇見過咩係存款利息
，打從戶口有真錢開始，銀行就已經唔會派利息。未有互聯網前流傳一個故事，就係老豆教仔，要儲第一個100萬港元，每月擺銀行有一萬蚊息，咁就夠家人生活。大抵呢個故事流傳時係70年代尾Paul Volcker高息政策時，現金唔止係王，仲可以源源不絕咁利疊利。
到高明開始都錢有概念時，主要都係借方。一來冇錢就要問人借，二來冇存款利率，同時借貸利率都唔貴，包括樓按甚至私人貸款，曾經借過少於一厘嘅私人貸款，可能係優惠啦，而其實樓按都唔使一厘，亦都反映當年資金幾咁泛濫。
當年學買賣股票，其中一種必然狀態，叫孖展，方法係首先借盡銀行嘅貸款，包括稅貸等唔同名目嘅貸款，然後放入唔同嘅證券行，再利用每間證券行嘅孖展額，如果計埋篤手指T+2清貨，基本上係無限倍孖展，因為本金都係借返嚟。零利率年代就有呢種玩法。今日利率情況當然成本大咗，使用方法都要與時並進 。
要有日數限制
如果真係進入減息周期，要利用孖展，應該點樣衡量。高明認為孖展嘅狀態，就有如去旅行一樣，撇除孖展後第二日股價斬頭呢種極端情況，大部份情況，槓桿買股票並唔係咁危險，只係每日都累積住成本。情況有如去旅行遇到有性命危險嘅事，以全球旅行人口計算機會率其實好低，但係每日旅行多一日就有酒店食住行等成本，並且放低咗你原先嘅工作。槓桿投資亦一樣，正經嘅投資組合係100%，一旦使用槓桿，即係傾斜去某一啲特別有信心嘅項目上，打亂咗正經事，並且每日有成本，唔同嘅當然係複利率。
正常買賣贏輸機會率各半，贏率扣除使費及差價可能約48%至49%，有弱勢但都叫平衡。一用槓桿就跌到三份一，升=贏、跌=輸、不變=畀息都係輸，隨住日數過去，要贏嘅幅度更大去抵銷利率嘅影響。
所以孖展唔怕戴，最緊要除得快，並唔係無道理。點樣用孖展應該有日數嘅限制，粗略計唔超過去旅行嘅日數，每年去幾多日旅行，就可以用幾多日孖展。如果全年都去旅行，習慣呢種付費狀態，當然可以用足全年；如果只係普通人，一年返鄉下日本5次，每次返5至7日，限住一年大概只得一個月時間有孖展，都幾符合人性，而股市一年上升最燦爛都係得一至兩個月，亦都毋須全年槓桿狀態。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com