投資的天空 - 張士佳 2013年1月18日
投資的天空：半新股比較易炒 - 張士佳
過去幾日市場常出現急升急跌的情況，10分鐘前可以升勢磅礡，但不消一陣卻已經兩個世界。
正如先前所說，現階段要炒大市多是事倍功半，基本上每一次有勢都幾乎係陷阱，實在無法估計這種升唔上跌唔落的局面會玩到幾時。
個股的炒風因為市況拉鋸有輕微減退，不過新股明顯升溫，始終股票市場幾乎慘淡了一年半載，尤其新股更是一潭死水，令不少企業在定價上都不敢太進取，為投資者留下不少水位。
番兜阿里要看估值
筆者打開圖表，發覺最近半新股的炒法有不少相似之處，有興趣的讀者不妨去做多點功課。半新股勝在無蟹貨，當資金仍然活躍時，炒賣難度相對較低。
講開新股，市場傳聞阿里巴巴集團已聘請兩間投行安排年內於本港上市，相信不少投資者或會對此嗤之以鼻，去年才私有化，咁快又上過？筆者自己都聽唔少投資者在此股上輸錢。老實說，阿里巴巴當年上市前，馬雲已是赫赫有名的「大人物」，只係當時股市氣氛太熾熱，令不少人將此股短炒變長?。不幸中招的，惟有當買了個教訓，並非每隻品牌響亮的股票，都可以談戀愛。至於今趟，若然阿里巴巴真的再上市，是否應該抽呢？雖然先前的經歷或令不少人卻步，但自己認為都要理性一點，最終還是看估值及市場需求。
談完股市，也想談談施政報告。CY冇再落重藥調控樓市，幾隻地產股紛創52周新高，社會自有不少批評聲音。筆者唔係「梁粉」，不過樓市問題是上任政府政策失誤遺留下來，時至今日，問題已非常嚴重，並唔係一時三刻解決到。又有太多既得利益團體，實在複雜至極。寄望政府始終唔實際，不要忘記自強不息，迎難而上才是香港人的核心價值，共勉之。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：引外資救蟹民？ - 胡孟青
下一則: 炒友Blog：樓市小陽春美聯落鑊 - 邱古奇
投資的天空 - 張士佳 舊文