投資的天空 - 張士佳 2013年1月9日
投資的天空：券商合奏要小心 - 張士佳
大市上周四去到23400後似乎有阻力，指數過去幾日表現麻麻，期指昨日更跌近200點，為近日熾熱的市況稍為潑一下冷水。
相信讀者近期應感受到甚麼叫禾雀亂飛，尤其是前日，指數近乎無鬱動，但股票卻炒得不亦樂乎，全日有近900隻股票上升，如果你的倉位有10隻8隻股票，應該總有一隻升5%以上，無論係有實力、概念的強勢股，抑或基本因素欠佳的細價股，投資者都照掃可也，可見市場情緒是如何高漲。
散戶參與度明顯增加
有人話股升市唔升的情況最好，因為散戶習慣用指數來睇市況，指數唔鬱時，散戶就會覺得市況麻麻，唔敢買貨?貨，筆者亦觀察到，過往周不時都會有這種情況，結果股票越升越多，到散戶忍不住追貨就接了火棒。
但係一本通書豈能睇到老，其實最近散戶的參與度已明顯增加，甚至見到部份人開始覺得股票好易贏，「即日賺了數千元」、「買了兩日唔夠已經升?兩、三成」等說話呢幾日都聽唔少，所以自己近日的策略係傾向保守，無話特別減好多貨，但絕對唔敢加貨。加上券商又來大合奏，基本上每次見到此現象，自己心中就會敲響警報，雖然資金充斥，大市再跌都未必跌太多，但現階段都唔敢太進取。
另外，昨日油氣服務設備及太陽能板塊均出現明顯回吐，亦是另一個對投資者的警告，因為在大市調整初期，很多時都會見到一些熱炒板塊忽然被洗倉，所以暫時保守一點會較適合。
至於上述提及的兩個板塊是否玩完仍言之尚早，始終概念有溢價，不如等找到支持買一注，以過往經驗，隨時撈到底，若不幸止蝕，相信會有一段時間沉寂下來，到時可暫且將精力放在其他板塊了。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：贏長途賽靠膽識 - 胡孟青
下一則: Follow Me ：志高超值 睇升1.4倍 - 高彰坡
投資的天空 - 張士佳 舊文