金融High Tea 2013年1月9日
金融High Tea——篤波
2013年1月9日
■「土產股神」李四叔的言論，充滿娛樂性之餘，其實同大行無分別，李四叔講實戰，總之咁諗就咁講，唔需要整色整水。資料圖片
大市經過一輪衝刺，終於出現一輪調整。中美股市近日借住不同好消息炒上，累積咗相當大的升幅，過去兩日內地A股同美股都係高位鞏固，港股跟住消化獲利，係按劇本發展的情節。
昨日調整都幾平均，不同類別股份都有番多少調整，分類指數只有公用類上升，撐住大市。地產股本來表現不俗，開市個別挑戰近期高位，但最後因為大市跌幅擴大，終於都要跟隨回落。
梁振英將於下星期三發表任內首份《施政報告》。花旗發表報告，預期本港樓市今年成交宗數只有7.5萬宗，較2010年的高峰期減少約45%，反映活躍的炒家、長期投資者及非本地買家數目已跌至歷史低位，相信新一份《施政報告》再推壓抑樓市措施機會不大。
頁岩氣股急回
報告認為，政府或着眼於增加供應，在農曆新年後，樓市一般會出現「小陽春」，預期交投2月將有實質改善，該行看好信置(083)、新地(016)、恒地(012)及長實(001)。
在各類股份都有回回下，港股連跌三日，昨日跌幅逾兩百點，算係較像樣的調整，仍守23100收市，恒生指數收報23111，跌218點；國企指數收報11714，跌258點，成交金額保持係828億元的高水平。
在沽貨獲利的市況下，升得多的石油設備股拋售最明顯，借住大行里昂出報告唱淡隻安東油田(3337)，上季勁炒的頁岩氣股全線下滑，巨濤海洋石油(3303)急挫9%，收報1.16元；海隆控股(1623)跌4%，報2.73元。此外，宏華(196)急降5%，報3.53元；中國油氣(702)5%元。至於主角安東油田收報3.49元，急插14%。
里昂唱淡頁岩氣股的邏輯，一啲都唔高深，甚至可以話係人都知，佢質疑安東油田過去盈利不穩定，頁岩氣收入剛剛開始時，能否真係可以咁好賺。陸羽仁早前都講過，中央有意加大頁岩氣發展，但相關技術同產業仍然係萌芽階段，故此炒這類股係炒概念，總之大家一擁而上炒高，炒呢類股最緊要係酒醉有三分醒，唔好以前自己真係做緊長線投資，落注前要定好止蝕位。
今次里昂的報告，好明顯係想喺汽球上篤窿，究竟佢會即刻篤爆個波、抑或係慢慢洩氣，還是只係令個波漲慢一啲，就好睇有無資金繼續谷落去個波到，由於呢次篤落去個價跌得幾急，投資者博反彈要記住此乃高難度的風險遊戲。
股神目標話咁快加碼
股民近日話題係土產股神李四叔評樓市，佢老人家去年話買股好過買樓，最初無人「騷」佢，近兩個月股市升咗，政府又打壓樓市，開始又多咗人聽佢講嘢。中環茶友話，早排李四叔接受周刊訪問，話恒指今年睇兩萬六千點，當時大家都覺得佢幾牛，跟住個市炒上，早兩日佢出嚟，就話年尾睇兩萬八千點，又重彈若然恒指上試三萬點，就捐十億元的豪語，話咁快土產股神目標價就加碼升咗兩千點，確係打針無咁快，咁樣算唔算見好唱好呢？
土產股神的言論，充滿娛樂性之餘，其實同大行無分別，不同係大行講包裝，無論唱好唱淡都有一大堆數據同理論支持，李四叔就講實戰，總之咁諗就咁講，唔需要整色整水，講直啲就係有智慧不如趁勢，見到個市升就加多兩錢肉緊，至於見到個市跌阿叔會唔會走先，呢啲就係後話嘞。
陸羽仁
上一頁 下一頁
金融High Tea 舊文